Никто не смел называть его по имени: вышел новый исторический роман «Князь-ваўкалак»
Чытачоў фэнтэзійна-прыгодніцкага рамана Максіма Кутузава «Князь-ваўкалак» чакае расповед пра ўладара вялікай дзяржавы ад мора да мора.
Пра тое, што не давала манарху заснуць, і пра простае манаршае шчасце. Пра крывавыя, хітрамудрыя здрады і нядоўгія уніі паміж дзяржавамі. Пра вясёлыя святы, дзе ўсе рагочуць, п’юць свой мёд і танчаць да галавакружэння… Карацей, рамантыка слаўнага мінулага і адрэналін — усё тое, за што чытачы гэтак любяць прыгодніцка-гістарычны жанр.
Але ёсць акалічнасць, якая робіць твор яшчэ больш інтрыгуючым: князь жа — ваўкалак! Непрадказальна, на якія ўчынкі будзе гатовы князь-пярэварацень дзеля сваёй краіны і ўлады…
Аматары гісторыі могуць знайсці ў рамане выразныя адсылкі да беларускай мінуўшчыны, але аўтар падкрэслівае: усе падабенствы выпадковыя…
Імя галоўнага героя невядома: сваю гісторыю князь распавядае асабіста, і ніхто з іншых персанажаў так і не пасмее назваць яго па імені — бо ніхто на коле паміраць не хацеў… Альтруістам і дабраком князя не назавеш. Малады і самаўпэўнены, ён любіць бавіць вольны час за алкаголем і з прыгажунямі ды не церпіць большасці «прафесійных» абавязкаў. Тым не менш, князь з заўзятасцю апантанага патрыёта любымі шляхамі спрабуе здабыць для сваёй краіны росквіт і славу. Часам удаецца, а часам… Памылкі манарха каштуюць дужа дорага…
«Князь-ваўкалак» выбіваецца з шэрагу стандартных фэнтэзійных аповедаў менавіта побытавасцю сюжэта, адсутнасцю эпічнай мэты ці ворага. У рамане вы не сустрэнеце велізарных войскаў эльфаў, марафоны за пярсцёнкамі ці аднабаковую ўзвышанасць герояў. Замест агідных монстраў —звычайныя людзі, якія ператвараюцца ў драпежнікаў, не змяняючы скуру на поўсць, і распачынаюць вайну, гвалт, здраду…
Знайсці раман можна на сайце выдавецтва «Галіяфы», а таксама ў іншых кнігарнях па ўсёй Беларусі.
Комментарии