«Еўрапейскія памкненні беларусаў павінны быць падтрыманыя». Ціханоўская заклікала Еўропу прыняць у дачыненні да Беларусі падвойную стратэгію
Святлана Ціханоўская заклікала падтрымаць еўрапейскія памкненні беларусаў і прыняць падвойную стратэгію ў дачыненні да Беларусі. Гэта прагучала падчас панэльнай дыскусіі Цэнтра еўрапейскіх палітычных даследаванняў у Бруселі, піша Reform.by.
«Да 2020 года беларусы былі лідарамі па колькасці выдадзеных шэнгенскіх віз на душу насельніцтва. Беларусы вучыліся ў еўрапейскіх універсітэтах, наладжвалі сувязі і бачылі, якім можа быць іх жыццё. Гэта прывяло да незваротных змен у беларускім грамадстве. Еўрапейскія памкненні беларусаў павінны быць падтрыманыя. Беларусы павінны бачыць, што ў Еўропе іх чакаюць і нават вітаюць. Беларусы павінны бачыць, што Еўропа адрознівае рэжым ад народа, а беларусаў ад расіян.
Еўропа павінна прыняць двухбаковую стратэгію ў дачыненні да Беларусі. З аднаго боку, трымаць дзверы адчыненымі для беларусаў: падтрымліваць грамадзянскую супольнасць, выдаваць візы і прымаць бежанцаў. А з іншага боку, ізаляваць усіх, хто стаіць на баку рэжыму і падтрымлівае вайну», — прапанавала Ціханоўская.
На яе думку, санкцыі могуць пазбавіць Беларусь рэсурсаў, аслабіць Расію і дапамагчы ў вызваленні палітвязняў.
«Мы не павінны дазваляць дыктатарам, якія ўцягнулі нас у цёмнае мінулае, шантажаваць або палохаць нас будучыняй.
Еўрапейскія абавязацельствы па падтрымцы пераходу Беларусі да дэмакратыі былі б эфектыўным адказам. Гэта надасць людзям упэўненасці.
Рэжым Лукашэнкі значна больш уразлівы, чым можа здацца. Ён падобны да крэсла з трыма ножкамі. Ён абапіраецца на рэпрэсіі, грошы і падтрымку Крамля. Выбіце адну з іх — і ён абрынецца.
Я ведаю, што санкцыі — гэта не срэбная куля. Але санкцыі могуць дапамагчы зламаць ногі рэжыму: пазбавіць яго рэсурсаў і аслабіць Расію.
Санкцыі могуць дапамагчы вызваліць з турмаў нашых палітычных зняволеных, але для гэтага патрэбны працаздольны механізм і прымусовае выкананне.
Пакуль рэжым здольны ўхіляцца ад іх, санкцыі не будуць мець ніякага эфекту», — падкрэсліла Ціханоўская.
«Праз 40 гадоў я магу ўявіць сабе моцную, аб'яднаную і квітнеючую Еўропу, крыніцу стабільнасці і міру на нашай планеце.
Гэта тая Еўропа, пра якую мы марым. І Беларусь павінна быць часткай гэтай Еўропы, каб мы маглі выжыць. Інтэлектуальны капітал і яркі творчы патэнцыял беларускага народа, а таксама яго маральная сіла стануць важным укладам у будаўніцтва нашага агульнага еўрапейскага дома.
Каб увасобіць гэтую еўрапейскую мару ў жыццё заўтра, мы павінны дзейнічаць смела сёння», — заявіла Святлана Ціханоўская.
Дэпутатка, якая рыхтуе прыгажунь для Лукашэнкі, выйшла замуж23
Каментары