Красоўкі Майкла Джордана прададзены за 2,2 мільёна даляраў. Гэта рэкорд
Пара красовак, у якіх калісьці гуляў легенда баскетбола Майкл Джордан, была прададзена на аўкцыёне за 2,2 млн даляраў. Гэта рэкордная сума за пару абутку, піша Бі-бі-сі.
Аўкцыённы дом Sotheby's напярэдадні таргоў ацэньваў красоўкі з аўтографам самога Джордана ў 2—4 млн даляраў.
Футболка, у якой ён гуляў у фінале НБА ў 1998 годзе, у 2022 годзе была прададзена за 10,1 мільёна даляраў.
На аўкцыёнах памятных рэчаў спартыўнага адзення рэчы, якія належалі Джордану, стабільна прадаюцца за казачныя сумы.
«Сённяшні рэкордны вынік яшчэ раз даказвае, што попыт на спартыўныя памятныя рэчы Майкла Джордана працягвае пераўзыходзіць усе чаканні», — сказаў Брам Вахтэр, кіраўнік аддзела паўсядзённага адзення і сучасных калекцый Sotheby's.
Папярэдні рэкорд для абутку Джордана — 1,47 млн даляраў за пару яго Nike Air Ships, выстаўленую на аўкцыён у 2021 годзе.
У Air Jordan XIII, якія пайшлі з аўкцыёну ў мінулы аўторак, зорка баскетбола гуляў у складзе каманды Chicago Bulls у 1997—98 гадах.
У гэтых красоўках Джордан набраў 37 ачкоў у другой гульні фінальнай серыі НБА 1998 года і прынёс Chicago Bulls перамогу над Utah Jazz з лікам 93-88.
Гэтая гісторыя падрабязна расказана ў дакументальным серыяле 2020 года «Апошні танец» пра апошні сезон Джордана ў складзе каманды.
Для самога спартсмена гэта быў шосты чэмпіянат НБА. Тады ж яго пяты раз назвалі самым каштоўным гульцом НБА.
Як паведаміў прадстаўнік аўкцыённага дома Sotheby's, адразу пасля перамогі ў другой гульні Джордан падарыў гэтыя красоўкі хлопчыку ў распранальні ў падзяку за тое, што той знайшоў яго згубленую куртку.
Air Jordans «Bred» — скарачэнне ад «чорна-чырвоныя» — адзіная пара красовак, якія Джордан надзяваў у фінальнай гульні НБА, сапраўднасць якой удалося пацвердзіць, паведамляе Sotheby's.
Джордан упершыню абуў красоўкі Air Jordan у 1984 годзе падчас свайго першага сезона ў камандзе Chicago Bulls. Air Jordan I сталі даступныя шырокай публіцы ў наступным годзе. На сённяшні дзень выпушчана больш за 30 розных мадэляў Air Jordan.
Джордан выйграў у агульнай колькасці шэсць чэмпіянатаў НБА, два залатыя медалі Алімпійскіх гульняў і мноства іншых узнагарод.
Ён лічыцца адным з найвялікшых спартсменаў усіх часоў.
Цяпер чытаюць
Унікальныя здымкі будаўніцтва Старога моста ў Гродне. Хто фатаграфаваў небяспечныя кесоны, у якіх людзі рызыкавалі на дне Нёмана, каб паставіць апоры? ШМАТ ФОТА77
Каментары