Намеснік камандзіра палка Каліноўскага прапанаваў стварыць Беларускі батальён у брыгадзе Астрожскага

Намеснік камандзіра палка Каліноўскага Вадзім Кабанчук прапанаваў стварыць беларускі батальён у літоўска-польска-ўкраінскай брыгадзе імя вялікага гетмана Канстанціна Астрожскага на тэрыторыі Польшчы і Украіны. Пра гэта ён заявіў сёння падчас анлайн-дыскусіі ў Радзе па замежнай палітыцы «Украінская прызма», адзначае Reform.by.

Кабанчук падзяліўся сваім бачаннем таго, як павінны стварацца беларускія інстытуцыі. Ён лічыць, што ўмацаваць вайсковы складнік можна было б з дапамогай стварэння легальнага падраздзялення па-за межамі Беларусі.

«Хацеў бы звярнуць увагу на разгортванне паўнавартаснага вайсковага падраздзялення ў складзе літоўска-польска-ўкраінскай брыгады. Фактычна гэтая брыгада была створаная ў тым ліку з такой інфармацыйнай мэтай. Гэта адносіцца да канцэпцыі Балта-Чарнаморскага рэгіёна. І тут не хапае беларускага складніка. Што можна зрабіць? На сённяшні дзень ёсць частка беларусаў, якія знаходзяцца ва Украіне як добраахвотнікі, якія бяруць удзел у баявых дзеяннях у складзе розных фармаванняў.

Большая іх частка знаходзіцца ў палку Каліноўскага. Полк Каліноўскага не існуе самастойна. Няма такой юрыдычнай адзінкі ва Украіне. І гэтая брыгада, калі б, напрыклад, разгарнулі батальён ва Украіне, дала б фактычна магчымасць фармальна інстытуцыяналізаваць беларускіх добраахвотнікаў. Гэта павысіла б якасць рэкрутынгу, якасць дакументальнага суправаджэння, павысіла б інфармацыйны складнік Беларусі, якіх цяпер не хапае», — патлумачыў намеснік камандзіра ПКК.

Ён лічыць, што ёсць таксама вялікая колькасць беларусаў, якія гатовыя служыць у беларускім падраздзяленні пры ўмове легальнага статусу на тэрыторыі ЕС.

«І ў нас вялікая частка беларускіх патрыётаў, якія хочуць далучыцца да гэтага вайсковага складніка, але з тых ці іншых прычын — гэта ў першую чаргу фінансавыя і дакументальныя — яны не могуць трапіць на тэрыторыю Украіны, але яны гатовыя служыць на тэрыторыі Еўрасаюза. І адзін батальён можна было б разгарнуць у Польшчы, дзе найбольшая канцэнтрацыя беларускай дыяспары.

З той умовай, што гэты батальён нёс бы вайскова-паліцэйскія функцыі. Напрыклад, яго можна было б выкарыстоўваць для той жа аховы польскай мяжы, дзе фактычна лукашэнкаўскі бок ладзіць пастаянныя правакацыі з гэтымі нелегальнымі мігрантамі. Само па сабе разгортванне яшчэ аднаго батальёна на тэрыторыі Еўрасаюза дало б, я ўпэўнены, беларускіх рэкрутаў, якія і склалі касцяк гэтай брыгады», — рэзюмаваў Кабанчук.

***

Рада па замежнай палітыцы «Украінская прызма» — гэта ўкраінская некамерцыйная арганізацыя, якая існуе як сеткавы аналітычны цэнтр у сферы замежнай палітыкі і міжнароднай бяспекі.

Літоўска-польска-ўкраінская імя вялікага гетмана Канстанціна Астрожскага брыгада — асобная брыгада трохпалковага складу краін Люблінскага трыкутніка, прызначаная для ўдзелу ў міжнародных міратворчых і гуманітарных аперацыях (у тым ліку ў аперацыях, якія праводзяцца пад эгідай ААН, ЕС і НАТА). Стварэнне брыгады з'яўляецца часткай плана падтрымкі Украіны, прынятага пасля саміту НАТА ў горадзе Ньюпарт.

• 16
• 0
• 5
• 0
• 1
• 1
• 0
• 0