Днямі краіны Балтыі абвясцілі аб рашэнні ствараць агульную лінію абароны. Міністр замежных спраў Літвы Габрыэлюс Ландсбергіс падкрэслівае, што гэты крок не накіраваны на тое, каб прадэманстраваць сумневы ў дачыненні да заходніх партнёраў. На ягоную думку, гэта падрыхтоўка да магчымай вайны, піша Delfi.lt.
«Гэта таксама палітычнае пасланне — пасланне Літвы, Латвіі і Эстоніі. Што мы адчуваем набліжэнне вайны. Мы разумеем, што, калі Расія не будзе спыненая ва Украіне, яна пойдзе далей. А далей будуць краіны Балтыі», — заявіў Ландсбергіс журналістам у Бруселі перад пасяджэннем Рады замежных спраў Еўрасаюза.
«Гэта не недавер, гэта — падрыхтоўка да таго, што можа адбыцца. І мы спадзяемся, што гэта стане дастатковым сігналам нашым сябрам і партнёрам у Еўропе, НАТА, што да гэтага варта ставіцца сур'ёзна», — дадаў ён.
Ландсбергіс падкрэсліў, што ўсе дзяржавы рэгіёна згодныя з тым, што час для падрыхтоўкі да супраціву магчымай агрэсіі вельмі абмежаваны.
«Калі Расію не спыніць, мы станем тымі, каму давядзецца яе спыняць», — падкрэсліў палітык.
На думку Ландсбергіса, тое, калі Расія зможа зноў на некага напасці, галоўным чынам залежыць ад поспеху Украіны ў вайне супраць Расіі.
«Перш за ўсё, поспех Украіны і перамога Украіны. Калі ім спадарожнічае поспех, яны выйграюць нам час. Украіна адваёўвае для нас час сваёй крывёй, сваімі жыццямі, усім, што ў яе ёсць. І мы не ведаем, колькі яшчэ часу яны змогуць нам выйграць», — сказаў міністр.
Міністры абароны Літвы, Латвіі і Эстоніі ў пятніцу падпісалі пратакол аб намерах па ўмацаванні супрацоўніцтва ў распрацоўцы мер контрмабільнасці на ўсходняй мяжы НАТА. Падчас сустрэчы ў Рызе яны таксама дамовіліся працягнуць сумеснае развіццё магчымасцяў высокамабільных ракетных артылерыйскіх сістэм HIMARS.
«Чаму мы павінны неяк ушчэмліваць сябе?». Дырэктарка РТБД патлумачыла, чаму паставіла спектакль паводле Пушкіна ў адным з апошніх тэатраў краіны, які працаваў па-беларуску5757
Каментары