У Наваполацку мужчыну арыштавалі за стары допіс пра гібель Рамана Бандарэнкі
Яго затрымалі днём 14 лютага пасля таго, як міліцыянт правёў маніторынг сацсетак.
У жыхара Наваполацка ў сацсетках знайшлі даўні допіс у памяць пра забітага сілавікамі Рамана Бандарэнку. Мужчыну затрымалі і адправілі на «суткі», пра гэта стала вядома з пастановы суда, піша «Люстэрка».
Паводле матэрыялаў справы, на старонцы мужчыны ва «УКантакце» была выяўленая публікацыя за 2020 год: фатаграфія Рамана Бандарэнкі з бел-чырвона-белымі стужкамі ў руках і подпіс «Не забудзем!». Гэты допіс знайшоў 26 студзеня 2024 года міліцыянт Наваполацкага ГАУС, які праводзіў «маніторынг» сацсетак.
Мужчыну затрымалі днём 14 лютага. На яго склалі пратакол паводле ч.1 арт. 24.23 КаАП аб парушэнні парадку правядзення масавых мерапрыемстваў. На думку міліцыі, новапалачанін, размясціўшы публікацыю на сваёй старонцы ў адкрытым доступе, выказаў свае «грамадска-палітычныя інтарэсы» без дазволу выканкама, а значыць, правёў несанкцыянаванае пікетаванне.
Затрыманага змясцілі ў ІЧУ. Суд адбыўся на наступны дзень, 15 лютага. Мужчына прызнаў віну і не адмаўляў, што размясціў гэты пост.
«Суд прыходзіць да высновы аб тым, што вышэйпаказанае дзеянне, здзейсненае В., сведчыць аб публічным выразе ім грамадска-палітычных, асабістых і іншых інтарэсаў», — гаворыцца ў судовым рашэнні.
Вынесла яго «суддзя Б.» — верагодна, гэта сумна вядомая наваполацкая суддзя Зінаіда Балаболава, на рахунку якой больш за сотню палітычна матываваных рашэнняў па адміністрацыйных артыкулах.
Жыхару Наваполацка ў выніку прызначылі сем сутак адміністрацыйнага арышту.
«Бульба» з Оршы пайшоў ваяваць за Расію — цяпер сястра шукае яго ці хаця б яго парэшткі9
Каментары