У Францыі машыніст на хаду саскочыў з хуткаснага цягніка, пакінуўшы ў ім сотні пасажыраў
Інцыдэнт адбыўся пад Парыжам у ноч перад каталіцкім Раством. У цягніку, які рухаўся з хуткасцю 300 км на гадзіну і застаўся без машыніста, знаходзіліся больш за 400 чалавек.
24 снежня ўвечары рух на высакахуткаснай чыгуначнай лініі LGV Sud-Est, якая злучае Парыж і Ліён, аказаўся паралізаваны на тры гадзіны. Гэта закранула больш за 10 тысяч пасажыраў.
Прычынай таму стала надвычайная сітуацыя на высокахуткасным рэйсе лаўкост-кампаніі Ouigo «Парыж — Сэнт-Эцьен», машыніст якога а 21-й наўпрост выскачыў з цягніку на поўным хаду, пакінуўшы на борце больш за 400 чалавек разам з персаналам.
Аўтаматычная сістэма хутка заўважыла адсутнасць машыніста і экстранна спыніла цягнік, выратаваўшы жыцці пасажыраў, перадае выданне The Times.
Супрацоўнікі чыгункі, якія ехалі на цягніку, пасля здарэння распавялі мясцовым медыя, што «вагоны ахапіла паніка».
Звязацца з машыністам, які знаходзіўся ў кабіне адзін і зачыніў яе перад выскокваннем з цягніку, не ўдавалася. Усе меркавалі, што машыніст страціў прытомнасць, кажуць супрацоўнікі рэйсу.
Калі цягнік быў спынены, кантралёр пайшоў уздоўж шляхоў, выламаў дзверы кабіны машыніста і высветліў, што яна пустая. На працягу дзвюх з лішнім гадзін службы экстраннай дапамогі шукалі машыніста ў цемры з ліхтарыкамі. Яго цела ўрэшце знайшлі дзякуючы інфрачырвонаму сканаванню дрона пажарнай службы.
Учынак 52-гадовага машыніста Бруна Рэджоні афіцыйна разглядаецца як акт самагубства, паведамляюць праваахоўныя службы і прадстаўнікі кампаніі Ouigo. Матывы Рэджоні ўсё яшчэ высвятляюцца следствам.
Самагубствы часта здараюцца ў перыяд Раства, але гэта быў першы выпадак у гісторыі французскіх чыгунак, калі машыніст сканчае жыццё самагубствам, выскачыўшы з хуткаснага цягніка, адзначае міністр транспарту Францыі Філіп Табаро.
«Бруна Рэджоні хацеў скончыць жыццё сам-насам. Сітуацыя магла быць яшчэ больш сур’ёзнай, калі б ён імкнуўся пусціць цягнік пад адхон», — дадаў міністр у інтэрв’ю мясцовым медыя.
Саюзы чыгуначнікаў і дэпутаты французскай апазіцыі рэзка асудзілі словы міністра ў адрас машыніста Бруна Рэджоні, назваўшы іх «галаслоўнымі і ганебнымі», бо ў Рэджоні, як аказалася, была добрая рэпутацыя і ён быў адным з афіцыйных прадстаўнікоў уплывовага і найбуйнейшага ў Францыі прафсаюза CGT (Усеагульная канфедэрацыя працы).
«Быць машыністам французскіх чыгунак — гэта вельмі цяжкая прафесія. Вы нікога не бачыце цэлы тыдзень. Трэба быць вельмі моцным псіхалагічна», — заявіў адзін з калегаў загінулага Бруна Рэджоні.
Пасля крытыкі міністр транспарту Табаро сказаў, што «яго першая заява па інцыдэнце была няправільна ўспрынятая», і дадаў, што «здарэнне перш за ўсё з’яўляецца чалавечай трагедыяй, якая закранула вопытнага машыніста, якога паважалі калегі».
Па падазрэнні ў забойстве цяжарнай мінчанкі затрымалі хакейнага суддзю Аляксея Гаўрылёнка6
Каментары