У порт Тартуса прыйшлі расійскія караблі. Расія выводзіць войскі з Сірыі?

Абодва караблі належаць ТАА «Абаронлагістыка» — суднаходнай кампаніі, якая працуе на Міністэрства абароны Расіі. Яны знаходзяцца пад санкцыямі ЗША.

Пасля падзення рэжыму Башара Асада канец расійскай вайсковай прысутнасці ў Сірыі быў пытаннем часу, казалі аналітыкі.

Мяркуючы па спадарожнікавых здымках, прааналізаваных BBC Verify, у апошнія тыдні ў порт Тартуса была перавезена вялікая колькасць вайсковай тэхнікі. На фота бачныя дзясяткі транспартных сродкаў і тоны абсталявання ў порце.

Звозіць абсталяванне расійскія вайскоўцы пачалі яшчэ ў сярэдзіне снежня. Тады ж з'явіліся першыя здымкі калон расійскай тэхнікі, якія рухаюцца на поўнач да базы з іншых раёнаў Сірыі.

Павялічыць

Прыбыццё караблёў супала з паведамленнямі сірыйскіх СМІ пра скасаванне дамовы з Расіяй аб арэндзе порта. Новы пераходны ўрад у Дамаску адмовіўся пацвердзіць гэтыя паведамленні для Бі-бі-сі, а афіцыйны прадстаўнік Крамля Дзмітрый Пяскоў на прэс-канферэнцыі ў Маскве таксама не стаў гэта каментаваць.

Тартус быў для Расіі адзінай базай у Міжземнамор'і, якая дазваляла расійскім войскам дазапраўляцца, папаўняць запасы і рамантаваць судны пры выкананні аперацый на Блізкім Усходзе і ў Афрыцы. Крэмль імкнуўся захаваць кантроль над гэтай базай. У снежні стала вядома, што Расія вядзе перамовы з новымі сірыйскімі ўладамі пра сваю далейшую прысутнасць, але дамова не была падоўжаная.

Сайты марскога сачэння паказваюць, што «Спарта» і «Спарта II» прышвартаваліся ў аўторак вечарам.

Павялічыць

Да гэтага ніводзін расійскі вайсковы карабель не быў заўважаны ў Тартусе пасля падзення рэжыму Асада ў пачатку снежня. На больш ранніх спадарожнікавых здымках высокага разрознення можна ўбачыць дзясяткі вайсковых машын, прыпаркаваных побач з тым месцам, дзе цяпер прышвартаваныя караблі. Таксама непадалёк знаходзіліся краны, якія звычайна выкарыстоўваюцца для пагрузкі абсталявання.

Цалкам магчыма, што ў порце таксама знаходзяцца яшчэ два расійскія вайсковыя караблі, паведаміў BBC Verify вайскова-марскі аналітык Фрэдэрык Ван Локерэн. Паводле яго слоў, судны «Іван Грэн» і «Аляксандр Атракоўскі « таксама могуць быць задзейнічаныя ў эвакуацыі. Гэтую здагадку падзяляе і ўкраінская вайсковая разведка, прадстаўнікі якой далі каментар BBC Verify.

«Пасля скасавання 49-гадовай дамовы арэнды для Расіі стала цалкам зразумела, што яна больш не можа спадзявацца на захаванне вайсковай прысутнасці ў Тартусе, і таму, відавочна, няма сэнсу больш заставацца там і адкладаць эвакуацыю», — кажа Ван Локерэн.

Аднак эвакуацыя ўсяго расійскага абсталявання можа заняць некаторы час, адзначае Антон Мардасаў з праграмы Інстытута Блізкага Усходу па Сірыі.

«За мінулыя гады туды [у Сірыю] было дастаўлена значна больш, чым могуць прыняць гэтыя караблі і судны», — сказаў Мардасаў BBC Verify.

Тым часам назіраецца працяг актыўнасці на галоўнай расійскай авіябазе ў Сірыі Хмеймім. Спадарожнікавыя здымкі паказваюць, як з моманту падзення рэжыму Асада вялікія расійскія самалёты перыядычна загружаюцца вайсковай тэхнікай.

Павялічыць

Украінская вайсковая разведка паведаміла, што з сярэдзіны снежня расійскія самалёты перакідалі вайскоўцаў і тэхніку з Хмейміма на авіябазы ў Лівіі як мінімум 10 разоў.

Масква аказвае падтрымку палявому камандзіру Халіфу Хафтару, які базуецца ў Тобруку, на ўсходзе Лівіі. Расія ўжо даўно захоўвае прысутнасць на дзвюх лівійскіх базах — Аль-Хадзім і Аль-Джуфра, сцвярджае ўкраінская разведка.

Сорча Маклаўд, Былы член працоўнай групы ААН, якая займаецца праблемай вайскоўцаў-наймітаў, расказала BBC Verify, што да нядаўняга часу гэтыя аб'екты знаходзіліся ў падпарадкаванні ПВК «Вагнер». Цяпер, з яе слоў, кіраванне базамі ўзялі на сябе непасрэдна расійскія ўлады.

На яе думку, перадыслакацыя расійскіх войскаў з Сірыі ў Лівію — лагічны крок з пункту гледжання Масквы, улічваючы, што Лівія стала цэнтрам аперацый расійскага Афрыканскага корпуса і, акрамя таго, можа служыць калідорам у іншыя рэгіёны Заходняй Афрыкі.

• 5
• 0
• 3
• 2
• 0
• 0
• 1
• 0