U port Tartusa pryjšli rasijskija karabli. Rasija vyvodzić vojski ź Siryi?

Abodva karabli naležać TAA «Abaronłahistyka» — sudnachodnaj kampanii, jakaja pracuje na Ministerstva abarony Rasii. Jany znachodziacca pad sankcyjami ZŠA.

Paśla padzieńnia režymu Bašara Asada kaniec rasijskaj vajskovaj prysutnaści ŭ Siryi byŭ pytańniem času, kazali analityki.

Miarkujučy pa spadarožnikavych zdymkach, praanalizavanych BBC Verify, u apošnija tydni ŭ port Tartusa była pieravieziena vialikaja kolkaść vajskovaj techniki. Na fota bačnyja dziasiatki transpartnych srodkaŭ i tony abstalavańnia ŭ porcie.

Zvozić abstalavańnie rasijskija vajskoŭcy pačali jašče ŭ siaredzinie śniežnia. Tady ž źjavilisia pieršyja zdymki kałon rasijskaj techniki, jakija ruchajucca na poŭnač da bazy ź inšych rajonaŭ Siryi.

Pavialičyć

Prybyćcio karabloŭ supała z paviedamleńniami siryjskich ŚMI pra skasavańnie damovy z Rasijaj ab arendzie porta. Novy pierachodny ŭrad u Damasku admoviŭsia paćvierdzić hetyja paviedamleńni dla Bi-bi-si, a aficyjny pradstaŭnik Kramla Dźmitryj Piaskoŭ na pres-kanfierencyi ŭ Maskvie taksama nie staŭ heta kamientavać.

Tartus byŭ dla Rasii adzinaj bazaj u Mižziemnamorji, jakaja dazvalała rasijskim vojskam dazapraŭlacca, papaŭniać zapasy i ramantavać sudny pry vykanańni apieracyj na Blizkim Uschodzie i ŭ Afrycy. Kreml imknuŭsia zachavać kantrol nad hetaj bazaj. U śniežni stała viadoma, što Rasija viadzie pieramovy z novymi siryjskimi ŭładami pra svaju dalejšuju prysutnaść, ale damova nie była padoŭžanaja.

Sajty marskoha sačeńnia pakazvajuć, što «Sparta» i «Sparta II» pryšvartavalisia ŭ aŭtorak viečaram.

Pavialičyć

Da hetaha nivodzin rasijski vajskovy karabiel nie byŭ zaŭvažany ŭ Tartusie paśla padzieńnia režymu Asada ŭ pačatku śniežnia. Na bolš rańnich spadarožnikavych zdymkach vysokaha razroźnieńnia možna ŭbačyć dziasiatki vajskovych mašyn, pryparkavanych pobač z tym miescam, dzie ciapier pryšvartavanyja karabli. Taksama niepadalok znachodzilisia krany, jakija zvyčajna vykarystoŭvajucca dla pahruzki abstalavańnia.

Całkam mahčyma, što ŭ porcie taksama znachodziacca jašče dva rasijskija vajskovyja karabli, paviedamiŭ BBC Verify vajskova-marski analityk Frederyk Van Łokieren. Pavodle jaho słoŭ, sudny «Ivan Hren» i «Alaksandr Atrakoŭski « taksama mohuć być zadziejničanyja ŭ evakuacyi. Hetuju zdahadku padzialaje i ŭkrainskaja vajskovaja raźviedka, pradstaŭniki jakoj dali kamientar BBC Verify.

«Paśla skasavańnia 49-hadovaj damovy arendy dla Rasii stała całkam zrazumieła, što jana bolš nie moža spadziavacca na zachavańnie vajskovaj prysutnaści ŭ Tartusie, i tamu, vidavočna, niama sensu bolš zastavacca tam i adkładać evakuacyju», — kaža Van Łokieren.

Adnak evakuacyja ŭsiaho rasijskaha abstalavańnia moža zaniać niekatory čas, adznačaje Anton Mardasaŭ z prahramy Instytuta Blizkaha Uschodu pa Siryi.

«Za minułyja hady tudy [u Siryju] było dastaŭlena značna bolš, čym mohuć pryniać hetyja karabli i sudny», — skazaŭ Mardasaŭ BBC Verify.

Tym časam nazirajecca praciah aktyŭnaści na hałoŭnaj rasijskaj avijabazie ŭ Siryi Chmiejmim. Spadarožnikavyja zdymki pakazvajuć, jak z momantu padzieńnia režymu Asada vialikija rasijskija samaloty pieryjadyčna zahružajucca vajskovaj technikaj.

Pavialičyć

Ukrainskaja vajskovaja raźviedka paviedamiła, što ź siaredziny śniežnia rasijskija samaloty pierakidali vajskoŭcaŭ i techniku z Chmiejmima na avijabazy ŭ Livii jak minimum 10 razoŭ.

Maskva akazvaje padtrymku palavomu kamandziru Chalifu Chaftaru, jaki bazujecca ŭ Tobruku, na ŭschodzie Livii. Rasija ŭžo daŭno zachoŭvaje prysutnaść na dźviuch livijskich bazach — Al-Chadzim i Al-Džufra, śćviardžaje ŭkrainskaja raźviedka.

Sorča Makłaŭd, Były člen pracoŭnaj hrupy AAN, jakaja zajmajecca prablemaj vajskoŭcaŭ-najmitaŭ, raskazała BBC Verify, što da niadaŭniaha času hetyja abjekty znachodzilisia ŭ padparadkavańni PVK «Vahnier». Ciapier, ź jaje słoŭ, kiravańnie bazami ŭziali na siabie niepasredna rasijskija ŭłady.

Na jaje dumku, pieradysłakacyja rasijskich vojskaŭ ź Siryi ŭ Liviju — łahičny krok z punktu hledžańnia Maskvy, uličvajučy, što Livija stała centram apieracyj rasijskaha Afrykanskaha korpusa i, akramia taho, moža słužyć kalidoram u inšyja rehijony Zachodniaj Afryki.

• 5
• 0
• 3
• 2
• 0
• 0
• 1
• 0