Шалёная чарга на выезд у Польшчу толькі расце. Вось колькі давядзецца чакаць, каб трапіць у Еўрасаюз на аўто
Тыдзень таму чарга была амаль у тры разы меншая.
Шалёныя чэргі вярнуліся
Па стане на 14 гадзін панядзелка, 4 жніўня, выезду з Беларусі ў Польшчу чакае 2115 легкавых машын.
Чарга пачала прыкметна павялічвацца з пятніцы і ўжо ноччу суботы перавысіла адзнаку ў 2000 машын. Папярэдні раз больш за 2000 легкавікоў у чарзе на ўезд у Польшчу было 1 ліпеня.
У тэматычных чатах людзі скардзяцца, што за апошнія суткі знізілася колькасць машын, аформленых за 24 гадзіны. Калі спачатку выклікалі да 560 машын, то за апошнія суткі — толькі 383, дзеляцца назіраннямі падарожнікі.
Іншыя выводзяць сярэднюю лічбу ў 422 аўто за суткі. Атрымліваецца, што з улікам часу на праходжанне самой мяжы трапіць у Польшчу, заняўшы чаргу цяпер, можна будзе не раней чым праз пяць сутак.
Для тых, хто мае грошы і не мае часу чакаць да 4—5 дзён, існуюць памагатыя, якія дапамагаюць праехаць граніцу па прыярытэце. Калі чарга на выезд большая за 2000 машын, то за такія паслугі просяць 200 еўра. Калі меншая, то можна знайсці ахвотных перасекчы мяжу і за 100 еўра.
У зваротным кірунку чарга, прынамсі пакуль, не такая вялікая. Тыя, хто раніцай у панядзелак вярталіся ў Беларусь, пішуць, што на прастой у чарзе і праходжанне мяжы ў іх сышло 17 гадзін.
Само праходжанне мяжы на аўто займае каля 9 гадзін.
Аўтобусы
На выезд з Беларусі ў Польшчу налічваецца 45 аўтобусаў і каля 30 — у зваротным кірунку. Так, напрыклад, аўтобус, які выехаў а 9-й раніцы 3 жніўня з Варшавы, у Беларусь трапіў толькі а 9-й раніцы 4 жніўня. Больш за 20 гадзін заняла менавіта чарга (аўтобус быў 30-м) і праходжанне кантролю.
Цяпер чытаюць
Трамп запрасіў Лукашэнку ўвайсці ў Раду міру па Газе40
Каментары