Нечаканы эфект: папулярны сродак ад вугроў можа дапамагчы мужчынам стаць бацькамі
Новае даследаванне паказвае, што ізатрэтынаін — вядомы прэпарат для лячэння цяжкіх формаў акне — можа палепшыць мужчынскую фертыльнасць.
Для мужчын з такімі дыягназамі, як крыптазоаспермія (амаль поўная адсутнасць сперматазоідаў у эякуляце) і азоаспермія (іх поўная адсутнасць), адзіным шанцам стаць бацькам доўгі час застаецца толькі інвазійная хірургічная аперацыя. Падчас яе медыкі спрабуюць здабыць сперматазоіды непасрэдна з яечак.
Аднак поспех такой працэдуры не гарантаваны (ён складае 40-60%), а сярод рызык — боль, крывацёк, інфекцыі і працяглае пашкоджанне яечак.
Згодна з новым даследаваннем, аб якім расказвае Live Science, новы спосаб вырашэння праблемы можа прапанаваць прэпарат ізатрэтынаін, які ў Беларусі прадаецца пад гандлёвымі назвамі «Акнекутан» і «Роакутан» і прызначаны для барацьбы з цяжкімі вуграмі.
Навукоўцы правялі эксперымент з удзелам 30 мужчын з цяжкімі формамі бясплоддзя (90% з іх ужо беспаспяхова праходзілі праз аперацыю). На працягу шасці месяцаў яны прымалі па 20 мг ізатрэтынаіну двойчы на дзень.
Вынікі ўразілі. У 11 удзельнікаў (амаль 40%) у эякуляце з'явіліся жыццяздольныя сперматазоіды. Прычым у 82% з іх першыя паляпшэнні былі заўважныя ўжо праз тры месяцы.
Больш за тое, сперматазоіды аказаліся эфектыўнымі: іх выкарыстанне ў працэдуры ЭКА прывяло да фарміравання здаровых эмбрыёнаў, некалькіх цяжарнасцяў і як мінімум аднаго нараджэння дзіцяці на момант публікацыі.
Нават тым, каму ўсё ж спатрэбілася аперацыя, прэпарат дапамог: працэдура здабыцця спермы стала значна карацейшай — у сярэднім 63 хвіліны замест 105.
«Гэтая таблетка зрабіла тое, чаго мала што магло дасягнуць у свеце мужчынскага бясплоддзя», — з захапленнем адзначае адзін з суаўтараў даследавання доктар Пол Турэк.
Як гэта працуе?
Для нармальнага развіцця сперматазоідаў у арганізме неабходна рэтыноевая кіслата — гэта актыўная форма вітаміну А, якая па сутнасці «уключае» гены, адказныя за гэты працэс.
Папярэднія даследаванні паказалі, што ў многіх мужчын з цяжкімі формамі бясплоддзя гэтай кіслаты ў яечках проста не хапае. Праз гэта працэс выпрацоўкі спермы спыняецца на раннім этапе.
Ізатрэтынаін — гэта сінтэтычны аналаг вітаміну А, вельмі падобны па сваёй структуры да рэтыноевай кіслаты. Таму ён здольны заняць яе месца і выканаць яе функцыю — даць арганізму неабходны сігнал для аднаўлення вытворчасці сперматазоідаў.
Пабочныя эфекты і бяспека
Праўда, лячэнне не прайшло без наступстваў. Усе ўдзельнікі сутыкнуліся з сухасцю скуры і патрэсканымі вуснамі. У некаторых з'явіліся высыпанні, раздражненне і змяніўся ўзровень халестэрыну. Тым не менш ніводзін з мужчын не спыніў лячэнне з-за пабочных эфектаў.
Важна памятаць: ізатрэтынаін катэгарычна забаронены для цяжарных жанчын, бо выклікае сур'ёзныя негатыўныя наступствы для развіцця плода. Але ў мужчын сітуацыя іншая. Прэпарат не пашкоджвае ДНК сперматазоідаў і не ўяўляе небяспекі для партнёрак ці будучых дзяцей.
Што далей?
Эксперты выказваюць асцярожны аптымізм. Яны падкрэсліваюць, што даследаванне было невялікім і патрабуе паўтарэння ў большым маштабе, перш чым можна будзе казаць пра сапраўдны прарыў.
Навукоўцы спадзяюцца вызначыць, якім менавіта мужчынам прэпарат дапаможа найбольш эфектыўна. Аднак на хвалі поспеху клініка аднаго з аўтараў даследавання (The Turek Clinic, Лос-Анджэлес) ужо прапануе шасцімесячную праграму лячэння для мужчын, якія хочуць стаць біялагічнымі бацькамі пад наглядам экспертаў.
Цяпер чытаюць
«Шпіён у кішэні»: расійскі месенджар Max сочыць за карыстальнікамі і дапамагае блакаваць VPN2
Каментары