Niečakany efiekt: papularny srodak ad vuhroŭ moža dapamahčy mužčynam stać baćkami

Dla mužčyn z takimi dyjahnazami, jak kryptazoaśpiermija (amal poŭnaja adsutnaść śpiermatazoidaŭ u ejakulacie) i azoaśpiermija (ich poŭnaja adsutnaść), adzinym šancam stać baćkam doŭhi čas zastajecca tolki invazijnaja chirurhičnaja apieracyja. Padčas jaje miedyki sprabujuć zdabyć śpiermatazoidy niepasredna ź jaječak.

Adnak pośpiech takoj pracedury nie harantavany (jon składaje 40-60%), a siarod ryzyk — bol, kryvaciok, infiekcyi i praciahłaje paškodžańnie jaječak.

Zhodna z novym daśledavańniem, ab jakim raskazvaje Live Science, novy sposab vyrašeńnia prablemy moža prapanavać preparat izatretynain, jaki ŭ Biełarusi pradajecca pad handlovymi nazvami «Akniekutan» i «Roakutan» i pryznačany dla baraćby ź ciažkimi vuhrami.

Navukoŭcy praviali ekśpierymient z udziełam 30 mužčyn ź ciažkimi formami biaspłodździa (90% ź ich užo biespaśpiachova prachodzili praz apieracyju). Na praciahu šaści miesiacaŭ jany prymali pa 20 mh izatretynainu dvojčy na dzień.

Vyniki ŭrazili. U 11 udzielnikaŭ (amal 40%) u ejakulacie źjavilisia žyćciazdolnyja śpiermatazoidy. Pryčym u 82% ź ich pieršyja palapšeńni byli zaŭvažnyja ŭžo praz try miesiacy.

Bolš za toje, śpiermatazoidy akazalisia efiektyŭnymi: ich vykarystańnie ŭ pracedury EKA pryviało da farmiravańnia zdarovych embryjonaŭ, niekalkich ciažarnaściaŭ i jak minimum adnaho naradžeńnia dziciaci na momant publikacyi.

Navat tym, kamu ŭsio ž spatrebiłasia apieracyja, preparat dapamoh: pracedura zdabyćcia śpiermy stała značna karaciejšaj — u siarednim 63 chviliny zamiest 105.

«Hetaja tabletka zrabiła toje, čaho mała što mahło dasiahnuć u śviecie mužčynskaha biaspłodździa», — z zachapleńniem adznačaje adzin z suaŭtaraŭ daśledavańnia doktar Poł Turek.

Jak heta pracuje?

Dla narmalnaha raźvićcia śpiermatazoidaŭ u arhaniźmie nieabchodna retynojevaja kisłata — heta aktyŭnaja forma vitaminu A, jakaja pa sutnaści «uklučaje» hieny, adkaznyja za hety praces.

Papiarednija daśledavańni pakazali, što ŭ mnohich mužčyn ź ciažkimi formami biaspłodździa hetaj kisłaty ŭ jaječkach prosta nie chapaje. Praz heta praces vypracoŭki śpiermy spyniajecca na rańnim etapie.

Izatretynain — heta sintetyčny anałah vitaminu A, vielmi padobny pa svajoj struktury da retynojevaj kisłaty. Tamu jon zdolny zaniać jaje miesca i vykanać jaje funkcyju — dać arhanizmu nieabchodny sihnał dla adnaŭleńnia vytvorčaści śpiermatazoidaŭ.

Pabočnyja efiekty i biaśpieka

Praŭda, lačeńnie nie prajšło biez nastupstvaŭ. Usie ŭdzielniki sutyknulisia z suchaściu skury i patreskanymi vusnami. U niekatorych źjavilisia vysypańni, razdražnieńnie i źmianiŭsia ŭzrovień chalesterynu. Tym nie mienš nivodzin z mužčyn nie spyniŭ lačeńnie z-za pabočnych efiektaŭ.

Važna pamiatać: izatretynain kateharyčna zabaronieny dla ciažarnych žančyn, bo vyklikaje surjoznyja niehatyŭnyja nastupstvy dla raźvićcia płoda. Ale ŭ mužčyn situacyja inšaja. Preparat nie paškodžvaje DNK śpiermatazoidaŭ i nie ŭjaŭlaje niebiaśpieki dla partniorak ci budučych dziaciej.

Što dalej?

Ekśpierty vykazvajuć aściarožny aptymizm. Jany padkreślivajuć, što daśledavańnie było nievialikim i patrabuje paŭtareńnia ŭ bolšym maštabie, pierš čym možna budzie kazać pra sapraŭdny praryŭ.

Navukoŭcy spadziajucca vyznačyć, jakim mienavita mužčynam preparat dapamoža najbolš efiektyŭna. Adnak na chvali pośpiechu klinika adnaho z aŭtaraŭ daśledavańnia (The Turek Clinic, Łos-Andželes) užo prapanuje šaścimiesiačnuju prahramu lačeńnia dla mužčyn, jakija chočuć stać bijałahičnymi baćkami pad nahladam ekśpiertaŭ.

• 6
• 0
• 0
• 0
• 1
• 0
• 0
• 0