У Польшчы выдалі падручнік для вывучэння беларускай мовы як замежнай. Ён пасуе і для саманавучання
Новы навучальны дапаможнік пад назвай «Беларуская мова. Практыкаванні і тэксты для чытання» выдадзены кафедрай беларусістыкі Варшаўскага ўніверсітэта.
Кніга разлічаная на тых, хто вывучае беларускую мову як замежную на пачатковых і сярэдніх узроўнях (A1—B1), пра гэта паведамляе афіцыйная старонка кафедры беларусістыкі Варшаўскага ўніверсітэта.
Яго аўтарка — вядомая мовазнаўца і выкладчыца ўніверсітэта Вольга Трацяк. Яна вядомая ў беларускай дыяспары як актыўная папулярызатарка роднай мовы: з 2019 года Вольга з'яўляецца ініцыятаркай і арганізатаркай міжнароднай акцыі «Беларуская дыктоўка» ў Варшаве, якая праводзіцца да Дня роднай мовы.
Таксама даследчыца ўваходзіць у Камісію сертыфікацыі валодання беларускай мовай і Галоўны камітэт Алімпіяды беларускай мовы ў Польшчы.
Новае грунтоўнае выданне мае 330 старонак, на якіх змешчана 150 практыкаванняў і 50 тэкстаў для чытання. Як адзначаюць у кафедры, заданні складзеныя такім чынам, каб паступова і сістэмна развіваць моўныя кампетэнцыі: ад разумення пісьмовага тэксту да пашырэння лексічнага запасу і працы над граматыкай.
Важная асаблівасць дапаможніка — універсальнасць. Ён пасуе як для працы з выкладчыкам, так і для самастойнага вывучэння, бо да выдання далучаны ключ з адказамі для самакантролю.
Публікацыя прафінансаваная Фондам дыдактычнай дасканаласці Факультэта практычнай лінгвістыкі Варшаўскага ўніверсітэта.
Як набыць?
Замовіць дапаможнік можна праз сакратарыят кафедры беларусістыкі, напісаўшы на электронную пошту: [email protected]. Заяўлены кошт — 39 злотых (каля 9 еўра).
«Месячны плацеж пацягне на 340 рублёў». Што будзе ў Беларусі з мабільным інтэрнэтам?15
Каментары