Кучынскі раскрытыкаваў літоўскую прапанову забараніць беларусам з часовым жыхарствам купляць нерухомасць
Дзяніс Кучынскі, кіраўнік літоўскага Офіса Святланы Ціханоўскай, раскрытыкаваў новую ініцыятыву літоўскіх кансерватараў. Дэпутаты прапануюць забараніць грамадзянам Беларусі, якія маюць толькі часовы дазвол на жыхарства, купляць нерухомасць у Літве, піша LRT.
Кучынскі адзначае, што людзі, якія маюць ДНЖ у Літве, ужо прайшлі дбайныя праверкі дэпартамента бяспекі. Калі ім дазволілі жыць у краіне, значыць, яны не ўяўляюць пагрозы.
Таму забарона на куплю жылля выглядае як няўдалая спроба паставіць пад сумнеў экспертызу саміх літоўскіх дзяржорганаў.
Дарадца Ціханоўскай падкрэсліў, што нават ва Украіне, нягледзячы на вайну, няма падобных абмежаванняў для беларусаў.
Ён нагадаў словы прэзідэнта Украіны аб тым, што беларускі народ не павінен адказваць за дзеянні рэжыму Лукашэнкі.
«І прэзідэнт Зяленскі ясна казаў, што беларусы не павінны адказваць за тое, што робіць Лукашэнка. Такіх абмежаванняў ва Украіне мы таксама не маем — беларусы, якія там жывуць, могуць купляць маёмасць. У Польшчы таксама», — сказаў ён.
Паводле слоў прадстаўніка Ціханоўскай, частка беларускага грамадства, якая жыве за мяжой, з'яўляецца праеўрапейскай, таму для яе важная мабільнасць і сігнал ад іншых краін, што Еўропа іх падтрымлівае.
Паводле слоў Кучынскага, такая забарона дасць зразумець беларусам, што ім не рады ў Літве.
«[У выпадку забароны на набыццё маёмасці] сігнал, я думаю, будзе такі, што не вельмі хочацца, каб беларусы жылі ў Літве, і тады гэта азначае, што яны з'едуць у Польшчу ці іншыя еўрапейскія краіны», — сказаў ён.
Гэта можа прывесці да адтоку праеўрапейскіх грамадзян, якія плацяць падаткі і развіваюць літоўскую эканоміку, у іншыя краіны ЕС — напрыклад, у тую ж Польшчу.
Літоўскія кансерватары прапануюць абмежаваць набыццё нерухомасці ў Літве для грамадзян Беларусі і Расіі. З такой ініцыятывай у Сейме выступілі прадстаўнікі апазіцыйнай партыі «Саюз Айчыны — Хрысціянскія дэмакраты Літвы». Яны прапануюць унесці папраўкі ў закон аб абмежавальных мерах, прынятых у сувязі з вайной ва Украіне.
***
Калі вы жывяце ў Літве, то можаце за хвіліну падтрымаць «Нашу Ніву» часткай вашага падаходнага падатку. Гэта не будзе каштаваць вам ані цэнта.
Вы проста перанакіруеце 1,2% ад ужо сплачанага вамі падатку пры падачы штогадовай дэкларацыі.
Вось падрабязная інструкцыя, як гэта зрабіць, калі вы працуеце ў Літве.
Цяпер чытаюць
«Калі пасадзяць зноў, то пасяджу». Пачобут пра сваё вызваленне, камеры смяротнікаў, бітву за гонар у судзе і жаданне вярнуцца4
Каментары
Ахахахаха, ды ўсе беларусы даўно ўжо зразумелі, што ім не рады ў Літве. Няўжо спадар Кучынскі толькі пасля гэтай прапановы прыйшоў да такой высновы? Там цэлы набор дыскрымінацыйных законаў існуе. Я ўжо не кажу пра перманентныя негатыўныя (мякка кажучы) выказванні з боку часткі літоўскіх палітыкаў у бок беларусаў