Літоўскія кансерватары дабіваюцца абмежавання права беларусаў на набыццё нерухомасці ў Літве
Літоўскія кансерватары прапануюць абмежаваць набыццё нерухомасці ў Літве для грамадзян Беларусі і Расіі. З такой ініцыятывай у Сейме выступілі прадстаўнікі апазіцыйнай партыі «Саюз Айчыны — Хрысціянскія дэмакраты Літвы». Яны прапануюць унесці папраўкі ў закон аб абмежавальных мерах, прынятых у сувязі з вайной ва Украіне, піша Delfi.lt.
Паводле праекта кансерватараў, грамадзянам Беларусі і Расіі плануюць забараніць купляць нерухомасць побач з вайсковымі палігонамі і іншымі стратэгічна важнымі аб’ектамі. Акрамя таго, прапануецца ўвесці больш строгія правілы: калі змены будуць ухваленыя, права набываць нерухомасць застанецца толькі ў тых грамадзян Беларусі і Расіі, якія маюць пастаянны дазвол на жыхарства ў Літве. Асобы з часовым дазволам на жыхарства такой магчымасці мець не будуць.
Таксама прапануецца, каб нават уладальнікі пастаяннага дазволу на жыхарства маглі набываць нерухомасць каля стратэгічных аб’ектаў толькі пасля атрымання дазволу ад літоўскіх устаноў. Ініцыятары лічаць, што такая маёмасць можа быць выкарыстаная ў варожых мэтах.
Паводле даных літоўскага Цэнтра рэгістраў, у 2022—2024 гадах грамадзяне Беларусі набылі 1834 аб’екты, з якіх 1152 знаходзяцца ў 10‑кіламетровай зоне ад стратэгічных аб’ектаў; 556 пакупнікоў мелі часовы дазвол на жыхарства. За той жа перыяд грамадзяне Расіі набылі ў Літве 2814 аб’ектаў нерухомасці. З іх 1845 чалавек набылі маёмасць у межах 10 кіламетраў ад важных інфраструктурных аб’ектаў, у тым ліку 364 — маючы толькі часовы дазвол на жыхарства.
Аўтары ініцыятывы сцвярджаюць, што грамадзяне Беларусі і Расіі даволі актыўна набываюць нерухомасць каля важных аб’ектаў, таму Літве варта ўзмацніць кантроль. Падобную прапанову кансерватары ўжо ўносілі год таму, але тады яна не атрымала падтрымкі. Цяпер яны плануюць зноў прадставіць дапрацаваны праект падчас вясновай сесіі Сейма, якая пачнецца 10 сакавіка.
Еўракамісія спрабавала дапамагчы Літве вярнуць фуры з Беларусі. Спробы назвалі «неправамернымі»
Літва анансавала пашырэнне санкцый у 20‑м пакеце
Як цяпер адправіць грошы з Літвы ў Беларусь, калі апошні банк адключыў там свае карткі?
Літва афіцыйна звярнулася ў ICAO ў сувязі з беларускімі кантрабанднымі шарамі
Падпалкоўніка з факультэта вайсковай разведкі судзяць за «здраду дзяржаве» па справе, якая выглядае палітычнай. Што пра яго вядома?6
Каментары