У Беларусі запускаюць першы завод з поўным цыклам вытворчасці віскі
У Фаніпалі Дзяржынскага раёна рыхтуецца да запуску першая ў краіне дыстылерыя поўнага цыклу па вытворчасці віскі — «Саюз». Прадпрыемства плануюць увесці ў эксплуатацыю да канца чэрвеня 2026 года, піша Tochka.by.
Віскі будуць вырабляць паводле класічнай шатландскай тэхналогіі з выкарыстаннем беларускага ячменю, вырашчанага ў Дзяржынскім раёне. Вытворчасць будзе ўключаць усе этапы: ад перапрацоўкі зерня і закісання да перагонкі, вытрымкі ў дубовых бочках і разліву гатовай прадукцыі.
На заводзе ўжо паставілі два медныя перагонныя кубы — аламбікі, якія атрымалі назвы «Казімір» і «Барбара». Лічыцца, што менавіта медзь дапамагае ачышчаць спірт ад непажаданых дамешкаў і фарміраваць характэрны водар напою.
Пасля запуску вытворчасці для наведвальнікаў арганізуюць экскурсіі. Госці змогуць убачыць увесь працэс стварэння віскі, даведацца пра асаблівасці вытрымкі ў дубовых бочках, а таксама пра ўплыў сыравіны на смак і водар напою.
Для паўналетніх наведвальнікаў прадугледжаныя дэгустацыі. На другім паверсе прадпрыемства ўжо абсталявалі лекторый для адукацыйных праграм і сустрэч.
Праект рэалізуе кампанія «ДГ-Цэнтр», вядомая таксама вытворчасцю чорнай ікры пад брэндам Admiral Husso. Таму экскурсію на дыстылерыю можна будзе сумясціць з наведваннем асятровага комплексу, размешчанага побач.
Паведамляецца, што школьнікаў на вытворчасць запрашаць не плануюць, аднак для студэнтаў профільных спецыяльнасцяў такія экскурсіі могуць выкарыстоўвацца ў адукацыйных мэтах.
Цяпер чытаюць
У Эстоніі арыштаваны Алег Маісееў, кажуць яго знаёмыя. Гэта былы кіроўца Ціханоўскай, які з часам стаў яе зацятым крытыкам12
Каментары