Еўрапейскі саюз ухваліў новы пакет санкцый супраць Расіі. Новыя абмежаванні накіраваныя супраць расійскага вайскова-прамысловага комплексу, «ценявога флоту», а таксама асоб і арганізацый, якія падтрымліваюць гібрыдныя дзеянні Масквы супраць краін Еўропы.
Па словах кіраўніцы еўрапейскай дыпламатыі Каі Калас, новыя санкцыі закранаюць ключавыя элементы расійскай вайсковай машыны і звужаюць магчымасці Расіі абыходзіць міжнародныя абмежаванні. Адначасова ў Еўрасаюзе працягваецца падрыхтоўка да яшчэ больш шырокага, 21‑га пакета санкцый.
У новы спіс уключылі сем фізічных асоб і 21 арганізацыю, звязаную з вытворчасцю і пастаўкамі беспілотнікаў, вайсковага абсталявання і падтрымкай расійскага ВПК, у тым ліку праз пасярэднікаў у іншых краінах.
Асобна санкцыі закранулі нафтавую інфраструктуру, якая выкарыстоўваецца для абыходу абмежаванняў. Пад іх трапілі дзве асобы і 24 арганізацыі, звязаныя з экспартам расійскай нафты і нафтапрадуктаў праз так званы «ценявы флот».
Сярод новых фігурантаў санкцый:
- мітрапаліт Сімферопальскі і Крымскі РПЦ Ціхан (Георгій Шаўкуноў), якога часта называюць духоўнікам Уладзіміра Пуціна;
- блогерка Sasha meets Russia Аляксандра Ёст. У 2022 годзе яна пераехала ў Маскву, тлумачачы сваё рашэнне «русафобіяй» на Захадзе і тым, што ў Расіі ёсць «традыцыйныя каштоўнасці» і адсутнічае «гендарны парадак дня»;
- былы ўпаўнаважаны па правах дзіцяці Расіі Павел Астахаў;
- Z-блогеры Раман Антонаўскі і Раман Фёдараў;
- вядучы прапагандысцкага ток-шоу «Время покажет» Анатоль Кузічаў;
- прадзюсарка RT Documentary Вольга Кірый;
- аглядальнік RT Ігар Мальцаў;
- Прэзідэнцкі фонд культурных ініцыятыў;
- МКАТ «НТК» — холдынгавая кампанія, распрацоўшчык сістэм распазнавання твараў NtechLab;
- Іжэўскі авіяцыйны завод і яшчэ шэраг абаронных прадпрыемстваў;
- суднаходныя структуры «Лукойла» і «Газпрамнафты».
Таксама Еўрасаюз працягнуў да 23 чэрвеня 2027 года санкцыі, уведзеныя пасля незаконнай анексіі Расіяй Крыма і Севастопаля.
Перад гэтым ЕС у красавіку прыняў 20‑ты пакет санкцый супраць Расіі, які стаў адным з найбуйнейшых за апошнія гады. Ён быў накіраваны на абмежаванне ключавых сектараў расійскай эканомікі, якія падтрымліваюць вайну супраць Украіны.
ЕС забароніць уезд удзельнікам вайны Расіі супраць Украіны
Еўрасаюз пакуль не будзе прызначаць перамоўшчыка з Пуціным
Да новага санкцыйнага пакета Еўрасаюза супраць Расіі і Беларусі далучыліся яшчэ 8 краін
ЕС плануе ўключыць у новы пакет санкцый абмежаванні ў дачыненні да патрыярха Кірыла і святароў РПЦ
Цяпер чытаюць
Герой Беларусі Марына Васілеўская нарадзіла дачку ад касманаўта Алега Навіцкага38
Каментары