«Вам вельмі пашанцавала». Заолаг растлумачыў, ці небяспечныя для чалавека сустрэчы з рыссю
Нядаўна ў аграгарадку Новы Двор Шчучынскага раёна на прыватны двор зайшла рысь. Гаспадар паспеў зняць незвычайную госцю на відэа: жывёла назірала за мужчынам здалёк, не набліжаючыся, а потым развярнулася і пайшла. Заолаг кампаніі «Дзікая прырода» Аляксандр Вінчэўскі растлумачыў выданню «Смартпрэс», ці можа такая сустрэча быць небяспечнай.
Паводле слоў заолага, здаровая рысь імкнецца не трапляцца чалавеку на вочы.
«Рысь, як і мядзведзь, пазбягае чалавека, і ёй гэта зрабіць прасцей, чым мядзведзю, таму сустракаюць іх вельмі рэдка. Пры сустрэчы з рыссю трэба радавацца, бо вам страшэнна пашанцавала», — лічыць Вінчэўскі.
Пры гэтым, у адрозненне ад мядзведзя, рысь у выпадку небяспекі нават не спрабуе абараняць сваіх дзіцянят ад чалавека.
Патэнцыйную небяспеку можа ўяўляць толькі жывёліна, хворая на шаленства, ці тая, што паводзіць сябе неадэкватна. Спецыяльных перыядаў, калі рысь становіцца больш агрэсіўнай у дачыненні да чалавека, у гэтага віду няма.
Аднак гэта не азначае, што драпежніка можна правакаваць або спрабаваць наблізіцца да яго.
Увогуле рысі вядуць вельмі скрытны лад жыцця. Акрамя таго, кожнай асобіне патрэбная вялікая паляўнічая тэрыторыя, якую яна абараняе ад іншых прадстаўнікоў свайго віду.
Спецыяліст таксама нагадаў, што рысь па-ранейшаму занесеная ў Чырвоную кнігу Беларусі.
Для Гродзенскай вобласці гэта ўжо не першая сустрэча з рыссю за апошні час. Раней жывёлу заўважалі каля дарогі паміж Азёрамі і Парэччам у Гродзенскім раёне, а яшчэ адну рысь жанчына сустрэла ў лесе недалёка ад Берштаў на той жа Шчучыншчыне.
У 2025 годзе ў Беларусі афіцыйна дазволілі паляванне на рысь — упершыню за 40 гадоў. Пры гэтым жывёліну не выключылі з Чырвонай кнігі: яна атрымала так званы падвойны статус — адначасова застаецца чырванакніжным відам і лічыцца «нармаванай паляўнічай жывёлай».
Паляванне на рысь магчымае толькі на тэрыторыях, прадугледжаных планам, зацверджаным Міністэрствам прыродных рэсурсаў і аховы навакольнага асяроддзя. У першы сезон такія ўчасткі вызначылі ў асобных раёнах Віцебскай, Гомельскай, Гродзенскай і Мінскай абласцей. Сезон працягваўся з 1 кастрычніка 2025 года па 31 студзеня 2026 года.
У 2025 годзе планавалася забіць 57 рысяў, але паляўнічыя адстрэлілі толькі шэсць жывёл — крыху больш за 10% ад дазволенай колькасці. Старшыня Беларускага таварыства паляўнічых і рыбаловаў Ігар Шуневіч тады назваў вынік «поўным правалам сезона».
Цяпер чытаюць
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам4444
Каментары