Пад Гроднам рысь выйшла з лесу і пазіравала людзям на бервяне ВІДЭА
Пад Гроднам людзі заўважылі дзікую рысь. Незвычайная сустрэча адбылася недалёка ад аграгарадка Азёры, на дарозе паміж Новай Рудой і Азёрамі, піша Newgrodno.by.
Для таго, каб пабачыць гэту жывёліну, не давялося нават ісці ў лес — рысь сама выйшла блізка да дарогі і сядзела на вялікім бервяне проста на ўзбочыне. Паводзіла сябе яна вельмі спакойна і расслаблена, нагадваючы свойскага ката, які адпачывае пасля таго, як паеў. Пры гэтым драпежнік уважліва назіраў за людзьмі, што здымалі яго на відэа.
Аўтар роліка адзначыў, што добра, што рысь не праявіла агрэсіі. Спецыялісты, аднак, нагадваюць, што гэтыя жывёлы звычайна не нападаюць на чалавека без прычыны. Небяспека можа ўзнікнуць толькі ў тым выпадку, калі звера моцна напалохаць або справакаваць. Таму пры сустрэчы з рыссю лепш не падыходзіць блізка і назіраць за ёй здалёк.
Рысь занесена ў Чырвоную кнігу Беларусі, таму шкода, нанесеная гэтай жывёле, караецца законам. У апошнія гады колькасць рысяў у краіне паступова павялічваецца. На канец 2025 года ў Беларусі налічвалася каля дзвюх тысяч асобін, таму сустрэчы з гэтымі драпежнікамі ў лясах становяцца ўсё больш частымі.
Іх нават зрабілі абмежавана паляўнічым відам і ў мінулым годзе адкрылі паляванне. Праўда, шмат ахвотных упаляваць гэтых звяроў пакуль што не набіраецца: кіраўнік Беларускага таварыства паляўнічых і рыбаловаў Ігар Шуневіч нядаўна наракаў, што гадавая квота і блізка не выбраная: з 57 запланаваных жывёл забілі толькі 6.
Цяпер чытаюць
Былы беларускі міліцыянер шукае «пародзістую прыгажуню». Называе сябе мільянерам, а сам судзіцца з былой жонкай за аліменты23
Каментары