Вынеслі прысуд бармену-беларусу, які планаваў падпал склада ў Польшчы
Грамадзянін Беларусі Віталь С. атрымаў 3 гады і 6 месяцаў пазбаўлення волі за падрыхтоўку падпалу склада ў польскім горадзе Холм. Паводле абвінавачання, ён дзейнічаў па заданні замежнай разведкі, піша Most.
Акрамя турэмнага зняволення, суд прызначыў беларусу штраф сумай 1500 злотых (каля 390 даляраў) і забараніў карыстацца публічнымі правамі на працягу дзевяці гадоў. Сярод такіх правоў у Польшчы могуць быць выбарчыя правы, магчымасць удзельнічаць у ажыццяўленні правасуддзя і працаваць на пэўных пасадах у дзяржаўных органах і ўстановах. Прысуд пакуль не набыў законнай сілы.
Як паведамлялася раней, мужчына працаваў барменам у рэстаране ў Любліне. Паводле польскіх спецслужбаў, яго завербавалі і перадавалі заданні праз Telegram. Па іх даручэнні ён правёў разведку шматпавярховага складскога комплексу ў Халме, зняў аб'ект на відэа і перадаў заказчыку падрыхтаваныя матэрыялы. За выкананне задання беларус атрымаў узнагароду ў крыптавалюце.
Следства сцвярджала, што Віталь С. распрацоўваў план падпалу склада, але ажыццявіць яго не паспеў. Супрацоўнікі польскага Агенцтва ўнутранай бяспекі (ABW) затрымалі яго 13 жніўня 2025 года. З таго часу ён знаходзіцца пад вартай. 27 ліпеня 2026 года абвінаваўчы акт па ягонай справе перадалі ў суд.
Акрамя справы, звязанай з падрыхтоўкай дыверсіі або шпіянажам, мужчыну таксама абвінавацілі ў захоўванні наркатычных рэчываў.
Каментары