Расследаванне знікнення Анжалікі Мельнікавай перавялі на больш высокі ўзровень

Справу расследавання таямнічага знікнення ў Варшаве спікеркі Каардынацыйнай рады Анжалікі Мельнікавай павінна ўзяць на сябе Нацыянальная пракуратура Польшчы, паведамляе RMF FM.

Анжаліка Мельнікава

Дакументы з папярэднімі высновамі паліцыі аб знікненні беларускай актывісткі на больш высокі ўзровень накіравала Варшаўская акруговая пракуратура.

Пытанне аб таямнічым знікненні ў Варшаве Анжалікі Мельнікавай павінна ўзяць на сябе Нацыянальная пракуратура, таму што, на думку следчых, справу павінны расследаваць пракуроры, якія займаюцца найбольш важнымі справамі, у тым ліку пытаннямі шпіянажу.

На сённяшні дзень пракурорскага расследавання па справе аб знікненні няма. Сабраныя матэрыялы паліцыя раней перадала Варшаўскай акруговай пракуратуры для таго, каб правесці так званую юрыдычна-крымінальную ацэнку доказаў і вырашыць, у якім кірунку і хто павінен весці расследаванне.

Пра знікненне спікеркі Каардынацыйнай рады Анжалікі Мельнікавай яе калегі паведамілі ўвечары 28 сакавіка. У заяве Паўла Латушкі гаварылася, што сувязь адсутнічае з 25 сакавіка, аднак гаворка ідзе пра анлайн-камунікацыю. Насамрэч Мельнікаву ўжывую не бачылі ўжо даўным-даўно. Пазней стала вядома, што Анжаліка Мельнікава пакінула тэрыторыю Еўрасаюза 26 лютага, а яе былы муж з'ехаў з Польшчы ў Беларусь 3 сакавіка.

7 красавіка журналістам «Люстэрка» ўдалося паразмаўляць з былым мужам Анжалікі Мельнікавай, які пацвердзіў, што знаходзіцца ў Беларусі, а дзеці — пры ім. Бацькі Мельнікавай у размове з журналістам «Еўрарадыё» таксама пацвердзілі, што дзеці знаходзяцца ў Беларусі, а пра месцазнаходжанне самой Анжалікі яны самі нічога не ведаюць і трывожацца.

8 красавіка віцэ-спікерка Каардынацыйнай рады Станіслава Гліннік, якая цяпер выконвае абавязкі спікеркі, паведаміла, што 13 сакавіка з акаўнта Анжалікі Мельнікавай былі спампаваныя файлы, да якіх яна мела доступ у рамках працы Каардынацыйнай рады. Сярод іх — стратэгічны план, бюджэт, унутраныя даклады і іншыя аперацыйныя матэрыялы пачынаючы з ліпеня 2024 года.

10 красавіка тэлеканалу «Белсат» стала вядома, што з рахунка фонду Białoruś Liberty, заснаванага Анжалікай Мельнікавай, знялі грошы. Зрабіла гэта яна сама ці хто іншы, пакуль невядома. 

Каментары да артыкула