Усевалад Сцебурака. Што сніцца старому сабаку? Верш

Усевалад Сцебурака апублікаваў у фэйсбуку новы верш.

***

Што сніцца старому сабаку? —
Шчанячая маладосць —
дзе ў лапах бясконцая сіла,
і зноў шаўкавіцца поўсць.

Яго абдымае вецер
і пах веснавой травы,
і крочыць з ім па планеце
яго гаспадар малады.

У пашчы — бліскучыя іклы,
танчэйшыя нюх і слых —
ён лепшы сабака ў свеце
і самы адважны з усіх!

І ўсё яшчэ ў самым пачатку —
дарогі, лугі і лясы,
шпацыр да салодкае стомы
і смачны скрылёк кілбасы.

Усё мроіцца гэта старэчы
і ён пасміхаецца ў сне…
сабачыя простыя рэчы
Дай Бог зразумець і мне.

Каментары да артыкула