У Гомелі жанчыну асудзілі за арганізацыю «абдымальных вечарынак»
У Гомелі Эканамічны суд разгледзеў справу супраць мясцовай жыхаркі, якая паўгода арганізоўвала так званыя «абдымальныя вечарынкі» без афіцыйнай рэгістрацыі дзейнасці, піша БелТА.
Здымак ілюстрацыйны. Фота: freepik.com
Жанчына ладзіла сустрэчы ў розных ёга-студыях, дзе 10—12 чалавек займаліся практыкамі знаёмства, самапрэзентацыі, візуальнага і тактыльнага кантакту, дыхальнымі практыкаваннямі і заданнямі на давер і разняволенасць.
За гэты час яна атрымала больш за 5,5 тысячы рублёў прыбытку. Пры гэтым ніякай спецыяльнай псіхалагічнай адукацыі арганізатарка не мела — толькі сярэднюю.
У судзе яна тлумачыла, што зарэгістраваная як самазанятая і сплачвае падаткі, а сустрэчы нібыта былі прысвечаныя развіццю навыкаў публічных выступленняў і зніжэнню стрэсу. Аднак суд палічыў, што фактычна жанчына аказвала псіхалагічную дапамогу — від дзейнасці, які дазволены толькі зарэгістраваным псіхолагам.
У выніку жанчыну прызналі вінаватай у незаконнай прадпрымальніцкай дзейнасці. Суд прызначыў ён штраф у памеры 25 базавых велічынь (1050 рублёў) і канфіскаваў увесь атрыманы прыбытак.
Чытайце таксама:
Падатковая на Брэстчыне зрабіла рэйд па прыбіральнях
Прадпрымальніка з Наваполацка будуць судзіць за раздрабленне бізнэсу