У анексаваным Крыме беларуса асудзілі за «шпіянаж»
У анексаваным Расіяй Крыме грамадзяніна Беларусі Аляксея Тамашова асудзілі за нібыта шпіянаж на карысць Украіны. У 2024 годзе яму прызначылі 14 гадоў зняволення ў калоніі строгага рэжыму. Цяпер ён адбывае пакаранне ў калоніі № 4 у горадзе Пугачоў Саратаўскай вобласці, піша «Радыё Свабода».
Здымак ілюстрацыйны
Паводле звестак праваабаронцаў, пэўны час Тамашова трымалі ў штрафным ізалятары.
Мужчыну затрымалі ў маі 2024 года, імаверна ў Севастопалі. Яго абвінавацілі ў тым, што ён нібыта перадаваў украінскім спецслужбам інфармацыю пра размяшчэнне і перамяшчэнне расійскіх войскаў і тэхнікі, а таксама ў нелаяльнасці да палітыкі Расіі. Прысуд вынес суд у Севастопалі.
Праваабаронцы з Крымскататарскага рэсурснага цэнтра адзначаюць, што пасля затрымання Аляксею Тамашову прызначылі прымусовае назіранне ў псіхіятра, а ў самім прысудзе не было канкрэтна сфармуляваных абвінавачанняў. Фактычна сцвярджалася, што ён мог нешта перадаць або нанесці шкоду, але дакладных доказаў гэтага ў рашэнні не прыводзілася.
Чытайце таксама:
За здраду дзяржаве будуць судзіць 68‑гадовага пенсіянера
Літовец паехаў наведаць сваякоў у Беларусь — яго арыштавалі і далі 15 гадоў. Кажуць, што за шпіянаж