Беларусцы закарцела папрацаваць за мяжой, але шлях яна абрала няўдалы

У Маскоўскі РАУС Брэста звярнулася 62‑гадовая жыхарка горада, якая паведаміла, што стала ахвярай махлярства. Яна страціла больш за 20 тысяч рублёў, спрабуючы ўладкавацца на працу за мяжой.

Фота ілюстрацыйнае

Жанчына знайшла ў інтэрнэце аб’яву пра працу за мяжой і звязалася з яе аўтарам. Пазней ёй паведамілі, што для выезду і працаўладкавання неабходна зарэгістраваць электронны кашалёк і папоўніць яго нібыта для пацвярджэння плацежаздольнасці.

Берасцейка выканала ўсе інструкцыі і перавяла на электронны рахунак больш за 20 тысяч рублёў. Калі ж праз некалькі дзён яна звярнулася ў службу падтрымкі, каб праверыць наяўнасць грошай, то даведалася, што сродкі з рахунку зніклі.

Цяпер міліцыя праводзіць праверку і ўстанаўлівае асоб, якія могуць быць датычныя да злачынства.

Сілавікі нагадваюць, што ашуканцы пры пошуку людзьмі працы часта патрабуюць аплату за афармленне дакументаў, візы, навучанне, спецадзенне або іншыя паслугі. Але ў выніку людзі могуць не атрымаць ні працы, ні сваіх грошай назад. Настойліва рэкамендуецца правяраць працадаўцаў і не перадаваць свае асабістыя, банкаўскія даныя і паролі невядомым асобам.

Каментары да артыкула