Лукашэнка папрасіў прабачэння ў Зяленскага
У інтэрв'ю тэлеканалу «Аль-Арабія» Аляксандр Лукашэнка абраў нечакана прымірэнчы тон адносна прэзідэнта Украіны Уладзіміра Зяленскага, які апошнім часам, наадварот, заняў адносна яго нашмат больш рэзкую і бескампрамісную пазіцыю.
Аляксандр Лукашэнка. Фота: Evgenia Novozhenina Pool Photo via AP
«Я недзе і перагнуў палку, але гэта быў адказ на вось гэтыя ягоныя недарэчныя заявы: «Ды ў нас 500 цэляў, ды мы ведаем, дзе там той Лукашэнка знаходзіцца, мы заўтра ўдарым ракетамі, беспілотнікамі», — прызнаў Лукашэнка неабачлівасць сваіх рэзкіх слоў.
«Калі Уладзімір Аляксандравіч пакрыўдзіўся, я выбачаюся за гэтыя словы», — сказаў ён.
Рэзкую ж рыторыку з боку Зяленскага на ягоны адрас Лукашэнка спісвае на ягоную маладосць і «нявопытнасць».
«Я маўчаў. Нават усе здзіўляліся, што я маўчаў. Я разумеў, чалавек знаходзіцца пад такім прэсам. Малады чалавек, нявопытны, ён не вайсковы чалавек. Але калі мне пачалі пагражаць, я вымушаны быў адказаць».
«Але, з іншага боку, ён павінен разумець, што ў нас часта кажуць: як спяваюць, так і адпяваюць. Таму трэба быць акуратнейшым і асцярожнейшым.
Тым больш ён цудоўна разумее, яшчэ раз падкрэсліваю, што з боку Беларусі і асабліва з майго боку нейкіх ваенных дзеянняў чакаць не варта», — паспрабаваў Лукашэнка зноў вярнуць сабе той вобраз у вачах украінцаў, які існаваў да 2022 года.
Чытайце таксама:
Лукашэнка заявіў пра сустрэчу з Пуціным у найбліжэйшы час
Лукашэнка нервова пракаментаваў візіт Ціханоўскай у Кіеў
Лукашэнка адказаў наконт 500 цэляў у Беларусі, намечаных Украінай