Упершыню падняўся ў неба найбуйнейшы ў свеце электрычны самалёт
Амерыканская кампанія Heart Aerospace упершыню падняла ў паветра прататып X1 — дэманстратар будучага 30‑меснага рэгіянальнага гібрыдна-электрычнага самалёта ES-30. На сёння гэта найбуйнейшы цалкам электрычны самалёт, які здзейсніў палёт.
Фота: Heart Aerospace
Выпрабавальны палёт прайшоў на базе Heart Aerospace ў міжнародным аэрапорце Платсбург у штаце Нью-Ёрк і доўжыўся 27 хвілін. Самалёт падняўся прыкладна на 335 метраў, а ягоная цалкам электрычная сілавая ўстаноўка развіла магутнасць больш за 1 МВт.
Фота: Heart Aerospace
Падчас выпрабаванняў X1 выканаў руленне, узлёт, набор вышыні, манеўраванне і пасадку. Галоўнай мэтай было праверыць магчымасць цалкам электрычнага палёту ва ўмовах, набліжаных да рэальнай эксплуатацыі. Самалёт працаваў выключна ад акумулятараў і за ўвесь першы палёт спажыў электраэнергіі прыкладна на 5 даляраў.
У Heart Aerospace лічаць, што электрычная сілавая ўстаноўка ў перспектыве дазволіць істотна скараціць эксплуатацыйныя выдаткі і залежнасць авіякампаній ад ваганняў цэнаў на авіяцыйнае паліва. Паводле ацэнак кампаніі, будучы ES-30 можа мець больш чым на 40% ніжэйшыя эксплуатацыйныя выдаткі ў параўнанні з рэгіянальнымі самалётамі папярэдніх пакаленняў. Гэта павінна быць дасягнута дзякуючы больш нізкім выдаткам на энергію і меншай патрэбе ў тэхнічным абслугоўванні электрычнай сілавой устаноўкі.
Фота: Heart Aerospace
X1 з'яўляецца поўнапамерным тэхналагічным дэманстратарам, створаным для праверкі асноўных тэхналогій, аэрадынамікі і лётных характарыстык будучага ES-30.
Серыйны ES-30 павінен стаць рэгіянальным пасажырскім самалётам на 30 чалавек. Ён атрымае гібрыдна-электрычную сілавую ўстаноўку і ўжо зацікавіў буйных авіяперавозчыкаў, у тым ліку United Airlines, Air Canada і JSX, якія заяўлялі пра намер набыць такія самалёты.
Кампанія ўжо будуе першы перадсерыйны ES-30 на сваім вытворчым прадпрыемстве ў Лос-Анджэлесе. Пачатак лётных выпрабаванняў самалёта запланаваны на 2028 год, а ўвесці яго ў камерцыйную эксплуатацыю плануюць у 2031 годзе.
У Heart Aerospace разлічваюць, што з развіццём акумулятарных тэхналогій эканамічныя перавагі электрычных самалётаў будуць павялічвацца. Калі праект будзе паспяховым, ES-30 можа стаць адным з першых камерцыйных рэгіянальных самалётаў, якія шырока выкарыстаюць электрычную цягу на кароткіх маршрутах.
Чытайце таксама:
Кітайскі авіялайнер упершыню выканаў міжнародны рэйс, кінуўшы выклік Boeing і Airbus
Амерыканцы распрацоўваюць натрыевыя акумулятары як альтэрнатыву літыевым, але баяцца кітайцаў
«Мапеды» сыходзяць у мінулае: Расія робіць «шахеды» рэактыўнымі. Чым гэта пагражае Украіне