Беларус жорстка адпомсціў былой жонцы праз 13 гадоў пасля разводу
У Гарадоцкім раёне 53‑гадовы мужчына напаў на былую жонку, з якой развёўся яшчэ ў 2013 годзе. Пра гэта паведамілі ў пракуратуры Віцебскай вобласці.
Здымак ілюстрацыйны. Фота: magnific.com
У красавіку 2026 года мужчыну вызвалілі са следчага ізалятара. У той жа дзень, будучы ў стане алкагольнага ап'янення, ён прыйшоў да дома былой жонкі. З рэўнасці мужчына пачаў разбіваць вокны. Жанчына выйшла на вуліцу, каб паспрабаваць яго супакоіць, але былы муж ударыў яе па галаве металічнай пласцінай.
У пацярпелай дыягнаставалі адкрытую чэрапна-мазгавую траўму.
У пракуратуры адзначылі, што мужчыну і раней неаднаразова прыцягвалі да крымінальнай адказнасці за гвалт у дачыненні да былой жонкі. Папярэднюю судзімасць ён атрымаў за пагрозу забіць гэту жанчыну.
У судзе абвінавачаны сваёй віны не прызнаў, аднак суд прызнаў яго вінаватым і прысудзіў да 5 гадоў пазбаўлення волі ў калоніі ўзмоцненага рэжыму.
Акрамя таго, мужчыну прызначылі прымусовае лячэнне ад хранічнага алкагалізму. На карысць пацярпелай з яго таксама спагналі 15 тысяч рублёў у якасці кампенсацыі маральнай шкоды.
Чытайце таксама:
«Яна гадамі цярпела, а пасля адзін раз ударыла мужа нажом — гэтага хапіла, каб забіць»