Belgee паказаў новы X50. Цяпер гэта бюджэтны красовер з атмасферным рухавіком і старым добрым аўтаматам
Навінка ўсяго на 700 рублёў даражэйшая за седан S50.
Фота: belgee-center.by
Coolray 3.0
Паўнавартаснай навінкай Belgee X50 назваць складана, бо фактычна гэта ўсё яшчэ даўно вядомы беларусам Geely Coolray, які пазней перайменавалі ў Belgee X50. Цягам двух гадоў гэты невялікі паркетнік быў самым прадаваным новым аўтамабілем у Беларусі.
Пазней у мадэлі выйшаў пераемнік Belgee X50+, а стары X50 у выніку перавыдалі ў спрошчанай версіі.
Галоўнае адрозненне тут у начынцы. Замест турбабензінавага рухавіка і рабатызаванай АКПП пад капотам у яго 1,5‑літровы атмасферны бензінавы рухавік з 4 цыліндрамі магутнасцю 122 к. с., які працуе ў пары з 6‑ступеньчатым класічным гідратрансфарматарным аўтаматам.
Такія самыя рухавікі і АКПП ставяць на седан S50. З прыемнага — рухавік прызначаны для працы на 92‑м бензіне. Вытворца абяцае сярэдні расход паліва ў змешаным рытме 7,2 літра на сотню.
Фота: belgee-center.by
Што яшчэ змянілася?
Але на гэтым эканомія не скончылася. Замест легкасплаўных дыскаў 17‑га дыяметру тут цяпер R16.
У машыны ўсяго дзве падушкі бяспекі, звычайныя галагенавыя фары, нават на падсветцы салона для задніх пасажыраў таксама сэканомілі. Абіўка багажніка цяпер пластыкавая.
Скрыншоты відэа: bolshoi_autoblog / Instagram
Цана пытання
У выніку такая машына каштуе 58 900 рублёў (каля 19 500 даляраў), што ўсяго на 700 рублёў даражэй, чым каштуе седан S50 у базавай камплектацыі, які мае такі самы рухавік, але пры гэтым абсталяваны механічнай каробкай перадач. Belgee S50 у камплектацыі Comfort Plus каштуе ўжо ад 62 400 рублёў (каля 20 700 даляраў). Праўда, і камплектацыя там будзе багацейшая.
Што да X50, то аўтамабіль будзе даступны толькі ў камплектацыі Standard.
Але сціплая камплектацыя — гэта, бадай, не асноўны кампраміс, з якім трэба будзе змірыцца пры куплі гэтага аўто. Галоўны мінус — гэта дынаміка разгону і магутнасць рухавіка як такога.