Try recepty makarony, jakija varta dadać u mieniu
Pasta z kurycaj i brokali ŭ śmietankovym sousie, fietučyni z hrybami i makarona z kabačkami i krevietkami — siońnia my navučym vas hatavać heta.
Pasta — vydatnaja ideja i dla viačery ź siabrami, i dla siamiejnaha abiedu, i jak ježa samotnika. Bolšaść sousaŭ hatujecca roŭna stolki ž, kolki varycca sama makarona, tamu zhatavać stravu možna davoli chutka. Isnuje bieźlič smakavych viersij — vybirajcie tuju, što vam padabajecca.
Chutčej za ŭsio, vy dobra viedajecie, jak pryhatavać makaronu z tamatnym sousam abo pastu karbanara, i nie raz dadavali ŭ makaronu italjanski sous piesta. Prapanujem varyjanty, jak jašče raznastaić hetu stravu.
Pasta z kurycaj i brokali ŭ śmietankovym sousie
Fota: thelemonbowl.com
Dla makarony z brokali vam spatrebicca:
- 1 stałovaja łyžka aliŭkavaha abo inšaha aleju,
- kurynaje file — u zaležnaści ad taho, jakija častki vam bolš daspadoby, heta moža być file hrudak abo nožak — prykładna 200 h,
- 200 h karotkaj makarony (matylki, rulki dy inšaja),
- 200 h brokali,
- 230 mł małaka abo viarškoŭ,
- 50 h ciortaha parmiezanu,
- 150 h śmietankovaha syru,
- 3 zubčyki časnaku,
- sol,
- mołaty čorny pierac.
Hatujecca makarona z brokali tak:
Razahrejcie alej na siarednim ahni. Vykładzicie na patelniu narezanaje kurynaje file, zapraŭcie śpiecyjami i absmažcie z kožnaha boku da źjaŭleńnia załacistaha koleru.
Makaronu apuścicie ŭ hatavanuju padsolenuju vadu. Za 2 chviliny da taho, jak jana zvarycca da stanu al dente (źlohku niedavaranaha; kolkaść chvilin takoj varki musić być paznačana na ŭpakoŭcy), dadajcie da makarony brokali. Potym źlicie vadu.
Na patelni źmiašajcie małako, parmiezan, śmietankovy syr, pakryšany časnok i śpiecyi. Hatujcie, čas ad času pamiešvajučy, pakul padliŭka nie zahuścieje.
Dadajcie ŭ padliŭku makaronu z brokali i kurycu i dobra ŭsio pieramiašajcie.
Fietučyne z hrybami ŭ śmietankovym sousie
Fota: Liz Macri / taste.com.au
Dla fietučyne z hrybami spatrebicca:
- makarona fietučyne abo inšaja — 400 h,
- šampińjony — 300 h,
- 10%-ja viarški — 300 mł,
- cybula — 1 štuka,
- masła — 20 h,
- aliŭkavy abo inšy alej,
- časnok — 3 zubčyki,
- sol,
- mołaty čorny pierac.
Hatujuć fietučyne z hrybami tak:
- Kładziom na patelniu masła i ŭlivajem nievialikuju kolkaść aliŭkavaha aleju; kali ŭsio razahrejecca, dadajom zdrobnieny časnok i absmažvajem 3 chviliny, paśla čaho časnok prybirajem.
- Kładziom na patelniu narezanyja płaścinami šampińjony. Hryby piačom da poŭnaha vypareńnia soku — jany pavinny ŭžo padpiačysia — i dadajom da ich pakryšanuju cybulu. Hryby i cybulu absmažvajem da załacistaha koleru, potym solim i pierčym, dadajom viarški.
- Hatujem prykładna 10 chvilin na słabym ahni. Padliŭka nie pavinna być zanadta hustoj. Kali tak atrymałasia — dadajcie ŭ jaje trochi kipniu i pavarycie jašče paru chvilin.
- Varym makaronu ŭ padsolenaj vadzie da stanu al dente i adkidvajem na drušlak. Možna dadać krychu masła.
- Vykładvajem makaronu na talerku i palivajem sousam. Dla bolšaj pikantnaści hatovuju stravu možna pasypać ciortym parmiezanam i sušanym bazilikam.
Pasta z kabačkami i krevietkami
Fota: Clodagh McKenna / today.com
Hatujuć makaronu z kabačkami i krevietkami tak:
- 400 h makarony,
- 1/3 kubka aliŭkavaha abo inšaha aleju,
- 4 maleńkija kabački, narezanyja kołcami,
- 2 parezanyja zubčyki časnaku,
- 300 h pamidoraŭ čery, razrezanych napałovu,
- 450 h siarednich čyščanych krevietak,
- śviežy bazilik, tonka narezany,
- sol,
- mołaty čorny pierac.
- Razahrejcie alej u patelni z toŭstymi ścienkami na siarednim ahni i padpiačycie kołcy kabačkoŭ, pakul jany nie padrumianiacca z abodvuch bakoŭ.
- Pastaŭcie na ahoń vialikuju kastrulu sa źlohku padsolenaj vadoj, dadajcie makaronu i hatujcie da stanu al dente.
- Pakul makarona hatujecca, dadajcie ŭ patelniu, na jakoj hatavalisia kabački, časnok, i smažcie jaho chvilinu ci dźvie na siarednim ahni, pakul jon nie stanie duchmianym.
- Dadajcie da časnaku pamidory i smažcie 3—4 chviliny, zatym dadajcie krevietki. Hatujcie na siarednim ahni, časta pamiešvajučy, pakul krevietki nie stanuć ružovymi i nie prapiakucca — kala 5 chvilin.
- Dadajcie kabački i hatujcie jašče 1—2 chviliny, kab kołcy cukini prahrelisia.
- Dadajcie bazilik, sol, pierac.
- Źlicie vadu z makarony, zachavaŭšy nievialiki kubak hetaj vady, i viarnicie makaronu ŭ kastrulu.
- Dadajcie sumieś krevietak, pamidoraŭ i kabački da makarony i hatujcie chvilinu ci dźvie na mocnym ahni, dadajučy trochi vady pry nieabchodnaści, pakul pasta nie stanie haračaj.
- Padavajcie, pasypaŭšy pakryšanaj piatruškaj.
Inšy i bolš prosty sposab hatavańnia pasty z krevietkami vyhladaje tak:
- U aliŭkavym alei rastapić masła (davoli vialiki kavałak).
- Dadać tudy časnok i tonka narezanyja kołcy kabačkoŭ. Davieści kabački da załacistaha koleru.
- Dadać krevietki i tušyć, uvieś čas pamiešvajučy. Za paru chvilin da hatoŭnaści dadać parezanyja čery, ale sačycie, kab pamidory nie pieratvarylisia ŭ padliŭku.
- Dadać pastu, bazilik, čorny pierac. Dobra źmiašać.
Čytajcie jašče:
Jak pryhatavać idealnuju makaronu? Voś praviły, jakimi kirujecca kožny italjaniec
Italjanskaja makarona pa canie jałavičyny. Jak ciapier vyhladajuć palicy ź jeŭrapiejskimi praduktami