Lidar hrupoŭki CHTŠ Achmied al-Šaraa abvieščany časovym prezidentam Siryi
Faktyčny lidar Siryi i kiraŭnik hrupoŭki «Chajat Tachryr aš-Šam» (CHTŠ) Achmied al-Šaraa aficyjna pryznačany časovym prezidentam krainy, piša Bi-bi-si.
Fota: Mosa'ab Elshamy, File / AP
Isłamisckaja hrupoŭka CHTŠ, jakaja zabaronienaja ŭ mnohich krainach jak terarystyčnaja arhanizacyja, pad kiraŭnictvam al-Šaraa ŭznačaliła nastupleńnie paŭstancaŭ, u vyniku jakoha ŭ pačatku śniežnia minułaha hoda ŭ Siryi byŭ zrynuty režym Bašara Asada.
Al-Šaraa, jaki ŭ minułym byŭ palavym kamandziram i nasiŭ psieŭdanim Abu Machamied al-Džułani, atrymaŭ paŭnamoctvy ad novych siryjskich uładaŭ, kab sfarmavać časovuju zakanadaŭčuju radu, jakaja budzie dziejničać da pryniaćcia novaj kanstytucyi krainy.
Ab pryznačeńni al-Šaraa było abvieščana na sustrečy ŭ Damasku, u jakoj udzielničali kamandziry inšych uzbrojenych hrupovak, što ŭvachodzili ŭ paŭstancki aljans pad kiraŭnictvam CHTŠ.
Siryjskaje kiraŭnictva taksama abviaściła ab rospusku ŭsich uzbrojenych hrupovak, datyčnych da źviaržeńnia režymu Asada, a taksama armii i śpiecsłužbaŭ, sfarmavanych pry papiaredniaj uładzie. Zamiest ich, jak paviedamlajecca, budzie stvorana novaja struktura, adkaznaja za biaśpieku, ale padrabiaznaści pakul nie raskryvajucca.
Al-Šaraa prosić jaho nie bajacca
Achmied Chusejn al-Šaraa ŭ junactvie nabyŭ viadomaść siarod džychadystaŭ, kali ŭ 19 hadoŭ źjechaŭ u Irak i ŭstupiŭ u šerahi «Al-Kaidy», kab, jak jon sam kazaŭ, supraćstajać uvarvańniu ZŠA. U 2006 hodzie jaho aryštavali amierykanskija siły ŭ Iraku, i jon amal piać hadoŭ pravioŭ u turmie.
Adrazu paśla vyzvaleńnia «Al-Kaida» daručyła jamu stvaryć svajo adździaleńnie ŭ Siryi, što jon i zrabiŭ.
Adnak ź ciaham času jon pačaŭ adychodzić ad hrupoŭki, zajaŭlajučy, što jaho pohlady źmianilisia, i jon bolš nie imkniecca da stvareńnia suśvietnaha chalifata, a choča skancentravacca na ŭmacavańni ŭłady ŭ Siryi.
Paśla źviaržeńnia režymu Asada mnohija ŭ Siryi, asabliva etničnyja i relihijnyja mienšaści, a taksama mnohija zachodnija lidary, z tryvohaj nazirali, jak faktyčnym kiraŭnikom krainy stanovicca čałaviek z bahatym džychadysckim minułym. Sam al-Šaraa ŭ šmatlikich intervju, u tym liku zachodnim ŚMI, zapeŭnivaje, što novaja Siryja i jaje ŭłady nie ŭjaŭlajuć pahrozy ni dla samich siryjcaŭ, ni dla śvietu.
Jon prosić nie paraŭnoŭvać situacyju ŭ Siryi z afhanskimi talibami, jakija zachapili tam uładu paśla vyvadu sił zachodniaj kaalicyi i ŭviali žorstkija zakony šaryjatu.
Siarod inšaha, Al-Šaraa abiacaje, što novyja siryjskija ŭłady nie buduć parušać pravy žančyn, zachavajuć adukacyju dastupnaj dla ŭsich, a taksama razzbrojać usie tamtejšyja isłamisckija hrupoŭki.
Na minułym tydni z Al-Šaraa sustreŭsia ministr zamiežnych spraŭ Biełarusi Maksim Ryžankoŭ.