Na hetym tydni va Ukrainu pryjedzie ministr finansaŭ ZŠA — pieršym z kamandy Trampa

Pra vizit ministra finansaŭ ZŠA Skota Biesenta va Ukrainu paviedamiŭ prezident ZŠA Donald Tramp.

Skot Biesent. Fota: AP Foto/Moriah Ratner

«Ja adpraŭlaju ministra finansaŭ Skota Biesenta va Ukrainu na sustreču z prezidentam Zialenskim. Vajna pavinna zaviaršycca i chutka zavieršycca — nadta šmat śmierciaŭ i razbureńnia. ZŠA vydatkavali miljardy dalaraŭ pa ŭsim śviecie, ale vynikaŭ amal niama. Kali Amieryka mocnaja, u śviecie panuje mir», — napisaŭ Tramp u svajoj sacsietcy Truth.

Biesent stanie pieršym čynoŭnikam novaj administracyi Trampa ŭ ranhu ministra, jaki naviedaje Ukrainu.

Krynicy ahienctvaŭ Reuters i Bloomberg miarkujuć, što Biesent padčas svajho vizitu budzie abmiarkoŭvać patencyjnuju ździełku pa pastaŭkach Ukrainaj ZŠA redkaziamielnych mietałaŭ. 

Donald Tramp na minułym tydni kazaŭ, što ŭ abmien na praciah amierykanskaj padtrymki Ukraina mahła b dać ZŠA dostup da svaich redkaziamielnych mietałaŭ. Prezident Ukrainy Uładzimir Zialenski ŭ svaju čarhu zajaviŭ, što hatovy pahadzicca na hetuju ŭmovu. Bolš taho, takaja prapanova ŭtrymlivałasia ŭ jahonym «Płanie pieramohi», padadzienym da razhladu sajuźnikaŭ Ukrainy vosieńniu minułaha hoda.

Ukraina zdabyvaje lityj, tytan i hrafit, jakija adnosiacca da liku krytyčnych minierałaŭ, nieabchodnych dla mnohich technałahičnych vyrabaŭ.

Akramia Biesenta, Uładzimir Zialenski źbirajecca sustrecca na Miunchienskaj kanfierencyi pa biaśpiecy, jakaja taksama płanujecca na hetym tydni, ź vice-prezidentam ZŠA Džej Dzi Vensam i inšymi členami kamandy Trampa. Taksama jon budzie dystancyjna havaryć z samim Trampam.

Kamientary da artykuła