Rasijskija simki šmat kaho ź biełarusaŭ zabłakujuć, a aŭtobusy ŭ Picier zastanucca biez Wi-Fi
Dyrektar turfirmy raskazaŭ pra siurpryzy z suviaźziu ŭ Rasii dla biełaruskich turystaŭ.
Zdymak nosić ilustracyjny charaktar. Fota: «Naša Niva»
Dyrektar turystyčnaj firmy «Słavija Tur» Dźmitryj Miłavanaŭ u tyktoku tłumačyć: admiena roŭminhu pamiž Biełaruśsiu i Rasijaj — faktyčna nijakaja nie admiena.
— Prosta źjavilisia cikavyja taryfy. Jak i abiacaŭ, na bližejšym rejsie ŭ Sankt-Pieciarburh my ŭsio vyprabavali. Sapraŭdy, ničoha dadatkova padklučać nie treba, u vas adrazu źjaŭlajecca 5 hihabajt internetu. Viadoma, važna pierad pajezdkaj udakładnić usio ŭ svajho mabilnaha apieratara. Moža, u vas nie padklučana aŭtamatyčna pasłuha roŭminhu ci niejki inšy taryf.
Dźmitryj adznačaje, što bolš-mienš usio pracavała, ale 5 hihabajt — heta, viadoma, davoli mała ŭ sučasnych umovach. Plus jany nie biaspłatnyja, a kaštujuć 25 rubloŭ.
— Paśla taho, jak hihabajty skončacca, vy možacie nabyć jašče adzin pakiet. Zdajecca, jon kaštuje 35 rubloŭ. Ale bolš kupić nielha. To-bok dalej pojdzie apłata za kožny miehabajt, i heta budzie našmat daražej.
Ale samym niepryjemnym Dźmitryj nazyvaje toje, što ciapier biełarusam, jakija nie majuć rehistracyi ŭ Rasii, nielha nabyvać tam sim-karty.
— Sioleta ŭ studzieni ŭ Rasii ŭnieśli źmieny ŭ zakon ab suviazi. Hałoŭnaje, što tyčycca nas, — biez rehistracyi (chacia b časovaj) niemahčyma kupić sim-karty. A ŭsie sim-karty, jakija vy nabyli raniej (u nas jany taksama byli), zdajecca, buduć pracavać da 1 lipienia. To-bok ich adklučać.
Raniej rasijskija ŚMI pisali, što pa ŭsich aformlenych da 1 studzienia 2025 hoda sim-kartach nieabchodna pieraaformić damovu z apierataram suviazi da 1 lipienia 2025 hoda. Pry hetym zamiežnym hramadzianam dazvalajuć na adzin pašpart aformić nie bolš za 10 simak (rasijanam — nie bolš za 20). Numary, pa jakich nie buduć pierazaklučany dahavory, paśla 1 lipienia adklučać.
Zaklučać abo pieraafarmlać damovy ab akazańni pasłuh mabilnaj suviazi anłajn zabaraniajecca. Nieabchodna asabistaja prysutnaść u sałonie apieratara suviazi.
Dźmitryj śćviardžaje, što jaho supracoŭnicy, jakija supravadžali tur u Sankt-Pieciarburh, zachodzili ŭ sałony «Miehafon» i «Biłajn». Jany sprabavali vyśvietlić, jak biełarusam usio ž nabyvać simki — vyśvietliłasia, što biez rehistracyi ŭ Rasii šansaŭ nul.
— Heta značyć, što dla nas zastaŭsia tolki internet u miežach «admieny roŭminhu» — nu i ŭ rasijskich hatelach. A jašče bolš žudasnaje, što z hetaha vynikaje — u našych aŭtobusach bolš nie budzie internetu. Bo ŭsie našy roŭtary pracavali praz rasijskija sim-karty.
Dyrektar kaža, što, pakolki turfirma biełaruskaja i ni ŭ kaho z supracoŭnikaŭ niama rehistracyi ŭ Rasii, jany nie mohuć nabyć novyja sim-karty dla ŭsich aŭtobusaŭ.
— Navat kali jak-niebudź praź siabra nabyć adnu-dźvie sim-karty, heta nie vyrašyć prablemu. U nas u siezon jeździć kala 25 aŭtobusaŭ na roznych kirunkach. Nabyć 25 levych simak praktyčna niemahčyma. Ustaŭlać u roŭtary biełaruskija simki z roŭminham — dyk tam usiaho 5 hihabajt, ich ni na što nie chopić.
Dźmitryj žartuje, što supravadžajučym stanie praściej, bo źniknie pretenzija, čamu internet u aŭtobusie nie pracuje.
— Čamu nie pracuje internet? Bo jaho niama. Ja razumieju, što heta ŭsio robicca ŭ metach biaśpieki, kab usio kantralavać, kab nichto levy ŭ internet nie zachodziŭ, simki nie nabyvaŭ. Ale dla turyzmu heta ŭsio ŭskładniaje žyćcio.