«Ja niešta nacisnuŭ — i ŭ mianie minus 20 rubloŭ!» Biełarusy raskazali, jak niespadziavana možna zhubić hrošy z bałansu telefona

«Ja niešta nacisnuŭ — i ŭ mianie minus dvaccać rubloŭ!»

Pieršaj historyjaj padzialiŭsia hamialčuk Alaksiej. Kurjoz adbyŭsia nie ź im asabista, a ź jahonym baćkam, jaki tady tolki-tolki asvojvaŭ mabilny internet. U hetym vypadku ŭsio skončyłasia, na ščaście, chepi-endam.

«Hod 2017-y, telefanuje mnie zasmučany baćka. Raskazvaje, što, maŭlaŭ, ja na telefonie niešta nacisnuŭ, i ŭ mianie minus 20 rubloŭ. Jon u mianie piensijanier, naradziŭsia jašče da palotu Haharyna ŭ kosmas, a z telefonam, jak heta časta byvaje, «na vy i šeptam».

Telefanuju mabilnamu apierataru — adkazvaje dziaŭčyna z pryjemnym hołasam. Cikaŭlusia: što tam moj baćka sabie napadklučaŭ? A tam pasłuhi, jakija navat samamu prasunutamu piensijanieru nu zusim nie patrebnyja.

Cikaŭlusia ŭ dziaŭčyny: jak być? Maŭlaŭ, vy ž sami vydatna razumiejecie, što ŭsiamu vinoj banalnaja čałaviečaja pamyłka. Pahladzicie jahonuju datu naradžeńnia. Pałovu słoŭ, jakija vy zaraz vymavili, jon i viedać nie viedaje. Łedzi ŭvajšła ŭ stanovišča: «Pačakajcie chvilinku, ja vas pierakluču», — dzielicca Alaksiej.

«Dalej hołas užo mužčynski i bolš surjozny. Ja ŭ farbach abmaloŭvaju situacyju. Mianie ŭvažliva vysłuchali i… adklučyli ŭsie niepatrebnyja pasłuhi, i što hałoŭnaje — viarnuli hrošy na bałans! Ni mnie, ni baćku, navat nie daviałosia kudyści iści i padpisvać niejkija papiery. Baćka abyšoŭsia tady lohkim spałocham, nu i nievialikim utykańniem, kab nie naciskaŭ, čaho nie treba», — uspomniŭ čytač.

Usia heta sprava, jak bačna, skončyłasia spryjalna dla Alaksieja i jahonaha baćki. Ale tak byvaje daloka nie zaŭsiody.

«Padklučyŭ» pasłuhu, nie žadajučy taho, i… zabyŭsia!

U Arcioma adbyłasia historyja, ź jakoj mnohija napeŭna sutykalisia: mabilny apieratar sam padklučaŭ niejkija pasłuhi bieź viedama abanienta. Darečy, ciapier takoje nie prakocić. Niadaŭna ŭłady zabaranili mabilnym apierataram padklučać płatnyja pasłuhi biez zapytu abanienta.

Ale ŭ Arcioma prablema ŭźnikła jašče da taho.

«Adnojčy mnie pryjšło paviedamleńnie, što na moj telefon padklučanaja niejkaja pasłuha, źviazanaja z knihami. Niešta kštałtu dostupu da anłajn-biblijateki. A mnie hetaja pasłuha naohuł nie patrebna była, ja jaje sam nikoli nie padklučyŭ by. U momant atrymańnia paviedamleńnia ja byŭ zaniaty, vyrašyŭ, što raźbiarusia z hetym potym. U vyniku zabyŭsia», — raskazvaje Arciom.

Jak heta časta i byvaje, małady čałaviek uspomniŭ pra heta praź niejki čas, kali z telefona pačali śpisvacca hrošy, pry hetym bolš, čym zvyčajna.

«Tady ŭžo pieračytaŭ paviedamleńnie, ulez u mabilny dadatak apieratara i adklučyŭ pasłuhu. Nikudy raźbiracca nie chadziŭ, tamu što straciŭ usiaho niekalki rubloŭ, ale sama pa sabie situacyja razzłavała. Čamu mabilny apieratar moža biez majho viedama padklučyć mnie niejkuju pasłuhu i śpisvać maje hrošy?»

Vypadkova ŭklučyŭ «pieradaču danych» na niekalki siekundaŭ

A ŭ nastupnaj historyis znoŭ niedarečnaja vypadkovaść. Svaim kurjozam padzialiŭsia Dźmitryj, jaki prykładna hod tamu pryjechaŭ na adzin dzień u Litvu. Roŭminh jon pry hetym vyrašyŭ nie padklučać, a karystacca Wi-Fi u roznych kaviarniach i inšych ustanovach.

«Paśla pierasiačeńnia miažy mnie na telefon stali prychodzić SMS-paviedamleńni z prapanovami padklučycca da roŭminhu ad roznych apierataraŭ. Ale ja ŭsio heta ihnaravaŭ. Potym dabraŭsia da kaviarni, zakazaŭ abied, padklučyŭsia da Wi-Fi i staŭ łazić u internecie. U niejki momant zachacieŭ zrabić skrynšot, ale zamiest hetaha vypadkova nacisnuŭ na «pieradaču źviestak» i ŭklučyŭ mabilny internet. Litaralna praz paru siekund adklučyŭsia, ale niekalki kiłabajtaŭ infarmacyi na moj telefon usio ž taki trapili», — dzielicca Dźmitryj.

Adhadajecie, kolki chłopcu kaštavali tyja samyja niekalki kiłabajtaŭ? Bolš za 20 rubloŭ! Bolš za toje — niebaraka «pajšoŭ u minus».

«Dakazvać kamuści niešta było biez tołku. Ja byccam by internetam nie karystaŭsia, padklučyŭ vypadkova, ale paru kiłabajtaŭ usio ž «źjeŭ» i na takoj niedarečnaj vypadkovaści straciŭ bolš za 20 rubloŭ», — raskazaŭ chłopiec.

Klančyła hrošy ŭ babul, kab pahasić doŭh

Nu i kudy ž biez padletkavaj biesturbotnaści, jakaja moža ŭlacieć u salidnuju kapiejčynu? Svaju historyju raskazała Maryja, jakaja, vidavočna, vielmi lubiła pasłuchać muzyku na telefonie.

«Mnie tady było ŭsiaho 15 hadoŭ, mabilny internet jašče byŭ niejkaj navinkaj, usich tonkaściaŭ i niuansaŭ jakoha pa maładości hadoŭ ja nie razumieła.

I niejak raz uklučyła internet i vyrašyła napampavać na telefon muzyki. Pakul raźbirałasia, što da čaho — na bałansie ŭžo vielizarny minus, ciapier heta było b prykładna 30 rubloŭ. Voś ulipła, padumała ja tady. Baćkam vyrašyła ničoha nie kazać, inakš mianie čakaŭ by dobry nahaniaj. Jany i ciapier nie viedajuć hetaj historyi.

Jak u vyniku pahasiła zapazyčanaść? Klančyła ŭ svaich babul, maŭlaŭ, na kišennyja vydatki, i pajšła pracavać — rasklejvać abjavy. Z horam napałovu doŭh usio ž pahasiła sama», — padzialiłasia Maryja.

200 rubloŭ za 10 miehabajt trafiku

A «čempijonam» pa stračanych hrašach možna nazvać hamielčuka, jaki paru hadoŭ tamu pajechaŭ da svaich znajomych u Brusel. Małady čałaviek byŭ u Bielhii pieršy raz, ale zahadzia damoviŭsia sustrecca sa svaim siabram kala adnoj stancyi mietro.

Chłopiec pry hetym vyrašyŭ nie kuplać jeŭrapiejskuju sim-kartu, bo ŭ aeraporcie pracavaŭ Wi-Fi, a ŭvieś astatni čas jon mierkavaŭ być ź siabrami.

«Ale ŭsio pajšło nie pa płanie, ja krychu zabłukaŭ i raźminuŭsia ź siabram u krainie, dzie byŭ upieršyniu. Jon mnie pakidaŭ svoj adras, ad mietro možna było dajści za 20 chvilin. Ale treba było hlanuć Google Karty. Ciapier jany pracujuć u režymie afłajn, ale paru hadoŭ tamu takoha nie było.

Datelefanavacca ź biełaruskaj simki čamuści nie atrymałasia, u mietro Wi-Fi nie było, a čas užo poźni — kaviarni byli začynienyja. Zastaŭsia adziny varyjant: uklučyć mabilny internet. Ja viedaŭ, što tam darahaja taryfikacyja, ale ja nie mierkavaŭ, što ŭsio nastolki žudasna…», — raskazaŭ hamialčuk.

Jon uklučyŭ mabilny internet, simka złaviła miascovaha apieratara Orange. Chłopiec adkryŭ Google Karty, uvioŭ adras siabra, pahladzieŭ, kudy iści (šlach byŭ prosty), i amal adrazu vyklučyŭ internet.

Nu, a dalej pačałosia cikavaje.

«Trafiku (apieratar aficyjna heta potym paćvierdziŭ i zafiksavaŭ) było patračana niašmat: krychu bolš za 9 «mietraŭ». Stolki važyć, naprykład, fota na telefonie ŭ drennaj jakaści. Nu, a dalej pačalisia siurpryzy… Spačatku pryjšła SMS, što ŭ mianie — minus 50 rubloŭ i mnie treba chutčej papoŭnić rachunak. Potym SMS užo nie prychodzili, ale na nastupny dzień maju simku pastavili na poŭnaje błakavańnie. Mnie nie mahli datelefanavacca ni žonka, ni partniory pa pracy. Ja prapuściŭ niekalki važnych zvankoŭ. Tolki kali ja padklučaŭsia dzieści pa Wi-Fi, moh źviazvacca praź miesiendžary. Uvohule, apieratar uvioŭ mianie ŭ poŭnuju telefonnuju izalacyju, adklučyŭšy ŭsie vidy vyklikaŭ, internet i SMS…», — uspaminaje małady čałaviek.

Kali jon pryjechaŭ u Homiel, to adrazu pajšoŭ u ofis mabilnaha apieratara na praśpiekcie Lenina.

«Jakoha-niebudź razumieńnia ci sproby ŭvajści ŭ situacyju ja nie pačuŭ. Naadvarot, supracoŭnica mnie ŭ maniery chichikańnia skazała, maŭlaŭ, vam jašče pašancavała, što vy trapili tolki na 200 rubloŭ. Vuń, ludzi niadaŭna ŭ Katar jeździli, internet uklučyli, trapili na 5 tysiač!», — dzielicca čytač.

Ciarpieć takoha hamialčuk nie staŭ. Napisaŭ abskardžańnie, ale na jaho pryjšła piśmovaja admova.

«Daviałosia zapłacić hetyja 200 rubloŭ za 10 miehabajt, ale pytańniaŭ, ščyra skazać, zastałosia šmat… Adkul uzialisia takija nieadekvatna šalonyja taryfy?», — havoryć paciarpieły.

«Čamu sim-karta ŭvachodzić u poŭnaje błakavańnie, jakoje mahčyma źniać, tolki apłaciŭšy ŭsiu sumu? Jašče zastałosia biez adkazu majo pytańnie: čamu ŭ mianie była apłata pa fakcie i 20 rubloŭ ja płaciŭ u kancy kožnaha miesiaca, a ciapier, kab źniali błakavańnie, ja pavinien byŭ zapłacić 220 rubloŭ, heta značyć pahasić ahulny minus, uličvajučy, što 20 rubloŭ ja jašče pa terminach nie pavinien byŭ płacić…», — uspaminaje małady čałaviek.

Akramia pytańniaŭ, jakija tak i paviśli biez adkazu, u hamielčuka zastaŭsia jašče i toj samy asadak…

«Hetaja situacyja mianie tady vielmi vybiła z kalainy: i tym, što adrazu zastaŭsia biez suviazi, i tym, što ni na jakija sastupki apieratar nie pajšoŭ. I jašče chaču dadać, što ni pry jakim raskładzie 10 miehabajt trafiku nie mohuć kaštavać 200 rubloŭ. Heta papachvaje tupa razvodam», — upeŭnieny surazmoŭca.

• 2
• 1
• 0
• 2
• 0
• 1
• 2
• 0