«Raśpiłavali bałharkaj siejf, uzłomvali skarbonki». Parafijanie Čyrvonaha kaścioła raskazali, jak z chrama vyvozili majomaść
Dniami stała viadoma, što skončany vyvaz majomaści ź minskaha Čyrvonaha kaścioła i nazvany mierkavany termin jaho «restaŭracyi». Ale heta navina, radasnaje ahučvańnie jakoj probaščam parafii śviatoha Symona i śviatoj Aleny sustrakali apładysmientami, ciapier vyklikaje ŭ viernikaŭ smutak i tryvohu. Niekatoryja ź ich padzialilisia svaimi dumkami z vydańniem Katolik.life.
Asabliva baluča parafijanam stała, kali probašč ksiondz Franc Rudź nazvaŭ padčas imšy mierkavany termin «restaŭracyi» chrama — paŭtara-dva hady. Dakładnyja płany ŭładaŭ pa rabotach u kaściole nieviadomyja, ale kali jany maštabnyja, to sapraŭdy na heta patrebien čas — srodki mohuć zakłaści ŭ inviestycyjnuju prahramu Minska na nastupny hod, i tolki tady budzie mahčymy pačatak asnoŭnych rabot.
Majomaść, vyviezienuju z kaścioła, składziravali ŭ starym chramie ŭ adnoj ź viosak u Minskim rajonie. Biblijateku i častku rečaŭ — u Chryścijanskim sacyjalnym centry.
Jak prachodziŭ vyvaz majomaści i čamu heta padzieja stała balučaj i tryvožnaj dla viernikaŭ — śviedčańni nižej:
«Łavy i kanfiesijanały, vyrablenyja niamieckimi majstrami, vieźlisia ŭ svoj čas z Hiermanii, a zaraz u razabranym stanie, bo inakš nie vyniesieš, štości dzieści pałamałasia. Arhany, instrumienty, statui, ikony, kopija Turynskaj płaščanicy — heta ž śviatyni, ich vyvaz — jak kiepski znak… Vielmi baluča i tryvožna. Nieviadoma, što budzie z kaściołam, na kolki zaciahniecca «restaŭracyja».
«Raśpiłavali bałharkaj siejf, uzłomvali skarbonki, choć jany byli pustyja».
«Asabliva balić serca za ksiandza Uładzisłava [Zavalniuka], jaki žyćcio i ŭsiaho siabie pryśviaciŭ hetamu kaściołu, i za tych starejšych, chto prykładaŭ stolki sił i namahańniaŭ, zmahaŭsia kaliści za hety kaścioł, adradžaŭ jaho, žyŭ im, a ciapier uśviedamlaje naprykancy žyćcia, što ŭžo bolš tudy nie vierniecca».
«Ździek i źniavaha našaj Śviatyni. Zdaryłasia najhoršaje».
«Apošniaja nadzieja, što chacia b viernuć nieŭzabavie kaścioł, ruchnuła. Voś tak raptam, vynosić usio da apošniaha, i tak upotajki, nijakaj dakładnaj infarmacyi. Pa inšych miescach raśpichvać, niby barachło jakoje».
Nahadajem, Čyrvony kaścioł u Minsku zakryty pa rasparadžeńni ŭładaŭ užo bolš za 2,5 hady nibyta praź nieabchodnaść praviadzieńnia tam ramontu. Parafijanie nie raz zajaŭlali, što chram nie patrabuje vialikaha ramontu i što jany hatovy vykanać jaho svaimi siłami.
Čytajcie taksama:
Z Čyrvonaha kaścioła ŭ Minsku ŭžo niekalki dzion vyvoziać rečy
Čyrvony kaścioł u Minsku chutka pačnuć ramantavać
U Vatykanie abmierkavali prablemu Čyrvonaha kaścioła i źniavolenych śviataroŭ
Čyrvony kaścioł u Minsku pakul nie adčyniać
Płany pa rekanstrukcyi kaścioła na Kalvaryjskich mohiłkach u Minsku pamianiali nie ŭ lepšy bok