Pałkoŭnik armii ZŠA pra pošuk źnikłych vajskoŭcaŭ u Padbrodździ: Za 24 hady słužby ja nie bačyŭ ničoha padobnaha

Džym Armstranh, jaki z amierykanskaha boku kiruje apieracyjaj pa pošuku źnikłych vajskoŭcaŭ, raspavioŭ pra hałoŭnyja ciažkaści.

Na palihonie ŭ Padbrodździ praciahvajecca apieracyja pa vymańni z bałota amierykanskaj vajskovaj mašyny, jakaja tam zatanuła. Usie fota: USArmyEURAF / Facebook

Kamandujučy bajavoj hrupaj bryhady braniavych vojskaŭ pałkoŭnik armii ZŠA Džym Armstranh raspavioŭ pra pošukavuju apieracyju niedaloka ad litoŭska-biełaruskaj miažy.

Armstranh uznačalvaje apieracyju i adznačaje, što situacyja vielmi składanaja, piša Delfi.

«Za 24 hady słužby ja nikoli nie bačyŭ, kab transpartny srodak apynuŭsia ŭ takim stanoviščy. Składanaść nie tolki ŭ tym, što tam vada i dryhva, prablema — u ich spałučeńni. Akramia taho, usio adbyvajecca ŭ miascovaści, kudy niaprosta dabracca», — skazaŭ Armstranh.

Jon kaža, što isnuje roznaje abstalavańnie dla vyciahvańnia abjektaŭ z vady abo z bałota, ale ŭ dadzienym vypadku davodzicca vykarystoŭvać roznuju techniku adnačasova.

«Prablema ŭ tym, što zvyčajna hetaje abstalavańnie nie pryznačana dla vykarystańnia ŭ padobnych umovach — u lasnoj hłušy, u nievialikim ciažkadastupnym miescy. Tamu apieracyja składanaja», — padkreśliŭ Armstranh.

Jašče adna prablema — dastaŭka techniki da miesca zdareńnia. Pavodle pałkoŭnika, heta asobnaja łahistyčnaja apieracyja, bo treba padrychtavać darohi dla transpartavańnia ciažkaj techniki, zavieźci hrunt i žvir.

Armstranh źviarnuŭ uvahu, što na abmiežavanaj prastory treba niejak raźmiaścić šmat techniki — i hramadzianskaj, i vajennaj, i mižnarodnaj.

«Adnak razam ź litoŭskimi vajskoŭcami našy vajskoŭcy ruchajucca napierad. My ŭsie pieražyvajem hetuju situacyju razam ź siemjami źnikłych i nie možam dastatkova padziakavać našym sajuźnikam za ich dapamohu», — skazaŭ jon.

Vajskovaja mašyna z čatyrma amierykancami prapała padčas vučeńniaŭ na litoŭska-biełaruskaj miažy viečaram 25 sakavika. Mašyna, jak miarkujecca, pravaliłasia na dno bałota.

Kamientary da artykuła