Apieracyja pa pošuku sałdataŭ ZŠA, što pravalilisia ŭ bałota ŭ Litvie, doŭžyłasia ŭsiu noč
Na palihonie ŭ Padbrodździ na praciahu ŭsioj nočy praciahvałasia składanaja apieracyja pa pošuku i vyratavańni sałdataŭ Złučanych Štataŭ Amieryki. Pavodle apošnich źviestak, na miescy zdareńnia praciahvajecca ŭmacavańnie hruntu, sprabujuć asušyć bałota, piša LRT.
Padrychtoŭvajucca da vykarystańnia śpiecyjalnaj techniki, a paźniej, z dapamohaj vadałazaŭ i śpiecyjalnaha padjomnaha abstalavańnia, płanujuć vyciahnuć husieničny transpartny srodak, jaki znachodzicca pad hraźziu na hłybini 3—5 mietraŭ.
Kolki času heta zojmie — dakładna nie viadoma.
Jašče ŭ čaćvier udzień kiraŭnik apieracyi, pałkoŭnik-lejtenant Aŭšryjus Bujkus vykazvaŭ nadzieju, što apieracyju atrymajecca zaviaršyć da vychadnych, ale padčas rabot pa ŭmacavańni hruntu vyśvietliłasia, što heta małaimavierna.
«Užo pryjechała hetaja ciažkaja technika, jakuju doŭha čakali. Mahčyma, usio paskorycca, adnak dakładnych prahnozaŭ ciapier sapraŭdy być nie moža», — skazaŭ jon telekanału LRT.
Paviedamleńnie pra źniknieńnie padčas vučeńniaŭ amierykanskich sałdataŭ i husieničnaha transpartnaha srodku na palihonie pastupiła ŭ aŭtorak u 16:15. U sieradu vojska paviedamlała, što mierkavanaje miesca zdareńnia vyznačana i pravodzicca apieracyja pa pošuku i vyratavańni. Jaje kaardynuje armija, taksama pryciahnutyja siły Departamienta pažarnaj biaśpieki i vyratavańnia (PAGD) i inšych ustanoŭ. Aktyvavany viertaloty Vajenna-pavietranych sił i Słužby achovy dziaržaŭnaj miažy (VSAT).
U sieradu dniom amierykanskaja armija paćvierdziła, što ŭ bałocie była znojdzienaja patanułaja husieničnaja mašyna M88 «Hercules».
Ciapier čytajuć
Palčys: Ja suprać dapamohi tym palitviaźniam, chto ŭ źniavoleńni pracavaŭ na administracyju5
Kamientary
[Zredahavana]