Ukrainskija drony atakavali adziny ŭ Rasii zavod optavałakna dla bieśpiłotnikaŭ

U noč na 5 krasavika ŭkrainskija drony masiravana atakavali roznyja rehijony Rasii. U Saransku pad udar trapiŭ adziny ŭ krainie zavod pa vytvorčaści optavałakna dla bieśpiłotnych latalnych aparataŭ AT «Aptyvałakonnyja sistemy», paviedamlaje Baza.

AT «Aptyvałakonnyja sistema» ŭ Saransku. Fota: cdn.3dnews.ru

Pavodle infarmacyi vydańnia, u vyniku ŭdaru na pradpryjemstvie ŭspychnuŭ pažar. Miascovyja žychary śćviardžajuć, što ŭ niebie nad horadam bačyli ad šaści da vaśmi dronaŭ.

Infarmacyju pra ataku paćvierdziŭ kiraŭnik Mardovii Arciom Zdunaŭ, jaki paviedamiŭ u svaim telehram-kanale, što abjektam udaru stała «adno z pradpryjemstvaŭ» rehijonu. Pavodle papiarednich źviestak, achviar niama.

Jašče adna ataka adbyłasia ŭ horadzie Čapajeŭsk Samarskaj vobłaści. Jak raskazaŭ hubiernatar rehijonu Viačasłaŭ Fiedaryščaŭ, u vyniku traplańnia drona na adnym z pramysłovych abjektaŭ uźnik pažar. Jon udakładniŭ, što paciarpiełych niama, a na miescy pracujuć ekstrannyja słužby i śpiecyjalisty MNS, jakija zajmajucca likvidacyjaj uzharańnia.

Choć kankretnaja nazva pradpryjemstva ŭ aficyjnym paviedamleńni nie paznačanaja, u Čapajeŭsku raźmieščany zavod AT «Pramsintez», jaki śpiecyjalizujecca na vytvorčaści vybuchovych rečyvaŭ. Hety zavod užo padviarhaŭsia napadu raniej — 22 sakavika. Adlehłaść ad Čapajeŭska da miažy z Ukrainaj składaje amal 890 kiłamietraŭ.

Akramia pramysłovych abjektaŭ, napadam padvierhlisia i elemienty infrastruktury. Pa słovach hubiernatara Biełharadskaj vobłaści Viačasłava Hładkova, u Novaaskolskaj akruzie byli paškodžanyja linii elektrapieradačy.

Minabarony Rasii ŭ svajoj spravazdačy zajaviła, što na praciahu minułaj nočy srodkami SPA było «źniščana i pierachoplena» 49 ukrainskich BPŁA samalotnaha typu nad roznymi rehijonami krainy: 16 dronaŭ — nad Varoniežskaj vobłaściu, 14 dronaŭ — nad Biełharadskaj vobłaściu, 6 dronaŭ — nad Kurskaj vobłaściu, 6 dronaŭ — nad Samarskaj vobłaściu, 3 drony — nad Respublikaj Mardovija, pa adnym bieśpiłotniku — nad Branskaj, Lipieckaj, Arłoŭskaj i Pienzienskaj abłaściami.

Kamientary da artykuła