Bieśpiłotniki atakavali pramysłovyja abjekty ŭ Kałužskaj, Rastoŭskaj i Varoniežskaj abłaściach Rasii
Ministerstva abarony Rasii paviedamiła, što za viečar sierady i noč na čaćvier SPA pierachapili 77 ukrainskich bieśpiłotnikaŭ.
U Kałužskaj vobłaści paśla ataki dronaŭ, pra adbićcio jakoj paviedamili miascovyja ŭłady, pačaŭsia pažar na pramysłovym pradpryjemstvie ŭ Dziaržynskim rajonie, paviedamlaje Rasijskaja słužba Radyjo Svaboda.
Adzin z supracoŭnikaŭ načnoj źmieny atrymaŭ lohkaje ranieńnie, zajaviŭ kiraŭnik rehijona Uładzisłaŭ Šapša. U Chvastavickim rajonie ŭ vyniku padzieńnia BPŁA była paškodžanaja suviazievaja vyška i linija elektrazabieśpiačeńnia, dadaŭ jon.
U Rastoŭskaj vobłaści paśla padzieńnia drona ŭ Šołachaŭskim rajonie adbyłosia ŭzharańnie na terytoryi nienazvanaha pramysłovaha abjekta. Časovy vykanaŭca abaviazkaŭ hubiernatara Juryj Ślusar śćviardžaje, što adbyŭsia «łandšaftny pažar». Na abjekcie nichto nie paciarpieŭ.
Hubiernatar Varoniežskaj vobłaści Alaksandr Husieŭ pozna ŭviečary ŭ sieradu paviedamiŭ pra ataku BPŁA na rehijon, u vyniku jakoj uźnik pažar na adnym z «abjektaŭ infrastruktury». Pra jaki kankretna abjekt išła havorka, jon nie ŭdakładniŭ. Paźniej hubiernatar raskazaŭ u telehramie, što pažar byŭ patušany, adznačyŭšy, što paciarpiełych niama, ale niebiaśpieka ataki BPŁA ŭ rehijonie zachoŭvajecca.
Ministerstva abarony Rasii paviedamiła, što za viečar sierady i noč na čaćvier SPA pierachapili 77 ukrainskich bieśpiłotnikaŭ: 30 — nad Branskaj vobłaściu, 25 — nad Kałužskaj, pa šeść — nad Kurskaj i Varoniežskaj, pa piać — nad Rastoŭskaj i Biełharodskaj abłaściami.
Ciapier čytajuć
Ciahnik Pinsk—Minsk spyniŭsia pad Dziaržynskam biez aciapleńnia. Paśla prybyćcia ŭ stalicu pasažyraŭ razabrali ludzi z sacsietak i raźvieźli pa chatach8
Kamientary