Amierykanskija technałohii bieśpiłotnikaŭ stali rasčaravańniem na poli boju.
Jak piša The Wall Street Journal, niahledziačy na šmatmiljardnyja ŭkładańni vienčurnaha kapitału, amierykanskija startapy pakul nie zmahli stvaryć efiektyŭnyja nievialikija drony, jakija Pientahon ličyć krytyčna važnymi dla budučych vojnaŭ.
Mnohija amierykanskija kampanii vypuskali darahija bieśpiłotniki, jakija drenna lotajuć. Tym časam ukrainskija kampanii navučylisia masava vyrablać drony, niahledziačy na abmiežavanyja resursy, i ciapier šukajuć novych klijentaŭ i inviestycyi.
Ciapier abodva baki abjadnoŭvajucca, i hety niečakany sajuz pryciahnuŭ uvahu Ministerstva abarony ZŠA.
Naprykład, paŭdniova-kalifarnijski startap CX2 letaś zaklučyŭ pahadnieńnie ab intehracyi svajho prahramnaha zabieśpiačeńnia i sensaraŭ va ŭkrainskija drony. Hety prajekt užo atrymaŭ adabreńnie Pientahona i, mahčyma, u chutkim časie budzie pastaŭlać drony dla armii ZŠA.
«Nivodnaja amierykanskaja kampanija nie paśpiavaje za Ukrainaj. Ich technałohii pracujuć. U ich jość idealnaja łabaratoryja z maksimalnymi staŭkami, dzie ŭsio praviarajecca ŭ bai», — cytuje vydańnie suzasnavalnika CX2 Nejtana Minca (Nathan Mintz).
Cikavaść Pientahona da ŭkrainskich dronaŭ padkreślivaje prablemy amierykanskich startapaŭ i dasiahnieńni Ukrainy paśla ŭvarvańnia Rasii. Niahledziačy na pryznańnie važnaści aŭtanomnych dronaŭ dla vojnaŭ budučyni i pryjarytetnaje finansavańnie ich raspracovak, ZŠA tak i nie zmahli stvaryć mahutnuju halinu.
Pavodle acenak Ministerstva abarony ZŠA, kraina moža vypuskać da 100 000 dronaŭ u hod, tady jak Ukraina ŭ 2024 hodzie vyrabiła bolš za dva miljony. Niekatoryja z hetych bieśpiłotnikaŭ zdolnyja pieraadolvać sotni kiłamietraŭ z bojezapasam i ŭžo vykarystoŭvalisia dla ŭdaraŭ pa terytoryi Rasii.
Ukraina choča stać suśvietnym lidaram u vytvorčaści dronaŭ
Jak adznačaje vydańnie, ukrainskija vytvorcy pačynajuć zadumvacca pra budučyniu paśla vajny, pakolki Kijeŭ i Vašynhton abmiarkoŭvajuć mahčymaść mirnych pieramoŭ. Pry hetym ekśpierty amierykanskaj bieśpiłotnaj haliny nie ličać, što «dypłamatyčnyja pavaroty» pamiž Ukrainaj i ZŠA paŭpłyvajuć na supracoŭnictva startapaŭ abo źniziać cikaŭnaść Pientahona da ŭkrainskich inavacyj.
Dla ŭkrainskich kampanij rost mahčymy tolki dziakujučy vychadu na źniešnija rynki, bo ŭ krainie dziejničajuć abmiežavańni na prybytak z prodažaŭ, a dziaržava nie moža skupić usio, što vyrablajecca.
«Ukraina vyrazna dała zrazumieć, što maje namier stać suśvietnaj stalicaj bieśpiłotnikaŭ paśla zakančeńnia hetaj vajny», — cytuje WSJ Dereka Uitli (Derek Whitley), suzasnavalnika startapa Vivum, jaki raspracoŭvaje štučny intelekt dla aŭtanomnych sistem.
Ukrainskija bieśpiłotniki ŭ dziesiać razoŭ tańniejšyja za amierykanskija anałahi i dakazali svaju efiektyŭnaść va ŭmovach radyjoelektronnaha padaŭleńnia. Amierykanskija kampanii adstajuć: ich drony stvarajucca i abnaŭlajucca pavolniej, a taksama časta nie vytrymlivajuć intensiŭnaha elektronnaha procidziejańnia.
Pieršyja kantrakty ź Pientahonam
Jak adznačaje WSJ, Ministerstva abarony ZŠA ŭpieršyniu padpisała kantrakty z dvuma ŭkrainska-amierykanskimi aljansami. Kampanii pravierać svaje dalnabojnyja ŭdarnyja drony hetaj viasnoj va Ukrainie, a zatym atrymajuć mahčymaść udzielničać u tenderach Pientahona.
Padraździaleńnie abaronnych inavacyj (Defense Innovation Unit) Ministerstva abarony ZŠA, stvoranaje dla paskoranaj intehracyi pieradavych hramadzianskich technałohij u ŭzbrojenyja siły ZŠA — taksama ŭpieršyniu dadało ŭkrainskaha vytvorcu dronaŭ Skyfall u śpis patencyjnych pastaŭščykoŭ armii ZŠA.
Hetaja kampanija vypuskaje tysiačy dronaŭ štodnia. Kali jaje ŭdarnyja drony z amierykanskim prahramnym zabieśpiačeńniem CX2 projduć testy biaśpieki, ich mohuć prapanavać armii ZŠA ŭžo ŭ hetym hodzie.
Amierykanskaja kampanija KEF Robotics i ŭkrainskaja Sensorama Lab stvaryli sumiesnaje pradpryjemstva Blue Arrow, jakoje raspracoŭvaje prahramnaje zabieśpiačeńnie i sensary dla dronaŭ, zdolnych latać va ŭmovach radyjoelektronnaha hłušeńnia. Blue Arrow užo zaklučyła kantrakty z armijami jeŭrapiejskich krain i teściruje svaje bieśpiłotniki na pieradavoj va Ukrainie.
«Nivodnaja kampanija ŭ ZŠA nie vypuskaje drony takimi tempami, jak Ukraina», — zajaviła vydańniu Volha Pahoda (Olga Pogoda), suzasnavalnica Blue Arrow.
Pieraškody na šlachu da suśvietnaha rynku
Niahledziačy na pośpiechi, ukrainskija kampanii sutykajucca z abmiežavańniami na ekspart dronaŭ. Jany ŭžo abjadnalisia dla łabiravańnia admieny zabarony i razam z amierykanskimi partniorami šukajuć abchodnyja šlachi.
Skyfall sprabuje atrymać śpiecyjalny dazvoł ad ukrainskaha ŭrada na prodaž svaich udarnych dronaŭ ZŠA.
Prezident Uładzimir Zialenski ŭ kastryčniku zajaviŭ, što ŭłady razhladajuć mahčymaść ekspartu zbroi ŭ krainy, jakija pastaŭlali ŭzbrajeńnie Ukrainie.
Adnak usio bolšy niedavier Kijeva da Vašynhtona moža ŭskładnić pastaŭki ŭkrainskich dronaŭ u ZŠA.
Jašče adna prablema — zaležnaść ad kitajskich detalaŭ. Kab pradavać bieśpiłotniki Ministerstvu abarony ZŠA, ukrainskim kampanijam daviadziecca šukać novych pastaŭščykoŭ.
Tym nie mienš, vytvorcy nie hublajuć aptymizmu. Kampanija Sine.Engineering, jakaja pastaŭlaje srodki radyjosuviazi i navihacyjnaje prahramnaje zabieśpiačeńnie dla ŭkrainskich vajskoŭcaŭ i vytvorcaŭ bieśpiłotnikaŭ, adkryvaje novaje jeŭrapiejskaje padraździaleńnie za miežami Ukrainy.
Z hetaj bazy kampanija płanuje pašyrać vytvorčaść i prodažy, u tym liku pastaŭlać pradukcyju amierykanskim abaronnym kampanijam, jakija pracujuć ź Pientahonam.
Dadatkovyja dachody dazvolać finansavać novyja raspracoŭki ŭ śfiery dronaŭ dla baraćby z Rasijaj.
Ciapier čytajuć
Minčuk aburyŭsia kantynhientam u staličnym mietro: Usie z novymi ajfonami, ale nie mohuć dazvolić sabie tannuju mašynu ci pajezdki na taksi?20
Kamientary