Ź Minska ŭ Hrodna zamiest maršrutak buduć jeździć kitajskija aŭtobusy

Z 21 krasavika na rehularnaj asnovie na maršrucie «Hrodna — Minsk» pačnuć kursiravać novyja sučasnyja aŭtobusy. Testavańnie pakazała ich efiektyŭnaść, tam ciapier u raskładzie budzie bolš za 40 rejsaŭ štodnia, paviedamiła Mižrehijanalnaja asacyjacyja pieravozčykaŭ (MAP).

Na maršrucie buduć pracavać aŭtobusy roznych pieravozčykaŭ z Hrodna i Minska — usie jany ŭvachodziać u Mižrehijanalnuju asacyjacyju pieravozčykaŭ.

Kitajskija aŭtobusy Zhong Tong nabyli naprykancy 2024 — pačatku 2025 hoda śpiecyjalna dla hetaha papularnaha maršrutu. Usiaho budzie pracavać 10 aŭtobusaŭ, a ahulny abjom inviestycyj skłaŭ 1,5 miljona dołaraŭ.

Pieravahi aŭtobusaŭ pierad maršrutkami, jak śćviardžaje MAP — heta kamfort i biaśpieka: zručnyja siadzieńni z ramianiami biaśpieki, indyvidualnyja USB-razietki, kandycyjaniery, vialikija bahažnyja adsieki. Da taho ž aŭtobusy lepš abaraniajuć u vypadku nadzvyčajnych situacyj.

Jašče adna pieravaha — umiaščalnaść. Aŭtobus moža pieravozić bolš za 40 pasažyraŭ (maršrutka — kala 15), što asabliva važna ŭ pikavyja hadziny i śviaty.

Pa časie aŭtobusy nibyta prajhravać maršrutkam nie buduć — ad centra Hrodna da vakzała ŭ Minsku šlach zajmaje 3 hadziny 50 chvilin. Pieršaja ranišniaja vyprava z Hrodna — u 2:00, prybyćcio ŭ Minsk — u 5:50. Apošni rejs u Hrodna adpraŭlajecca ź Minska ŭ 23:50. U pikavyja časy aŭtobusy chodziać kožnyja paŭhadziny.

Canu na kvitki abiacajuć nie mianiać — jana zastajecca 35 rubloŭ. Bolš za toje, praz apieratara Atlas dziejničaje dynamičnaje cenaŭtvareńnie: bilety na mienš zapatrabavanyja rejsy abo pry rańnim braniravańni možna nabyć za 30—31 rubiel.

Aŭtobusy ŭpryhožvajuć śpiecyjalnymi liŭrejami z nacyjanalnymi i rehijanalnymi matyvami: na bartach namalavanyja zamki Hrodna, dramteatr, Nacyjanalnaja biblijateka, «Varoty Minska», zubr i vasilki.

Što da maršrutak, to jany zastajucca pa-raniejšamu aktualnymi, ale nie na hrodzienskim napramku, a na niekatorych inšych, dzie jany bolš ekanamičnyja. 

Pieršyja aŭtobusy Zhong Tong źjavilisia na maršrucie Hrodna-Minsk u śniežni 2024 hoda, nahadvaje ŭ suviazi z hetaj navinoj vydańnie Hrodna.life. Niekatoryja hrodziency, jakija paśpieli prajechacca na novym transparcie, adnak, zastalisia niezadavolenymi, choć uvohule dumki padzialiłasia. Adnyja adznačali, što kitajskija aŭtobusy ciesnyja i niekamfortnyja, a inšyja ŭzradavalisia najaŭnaści razietak i bolšaj biaśpiecy, u paraŭnańni z maršrutkami.

Kamientary da artykuła