Praz «pahrozu žyćciu i zdaroŭju hramadzian». U Minsku da kanca hoda pierakryjuć vulicu Haładzieda

Vyjechać pa joj z Čyžoŭki aŭtamabilisty nie zmohuć užo z 10 maja.

Most cieraź Śvisłač pa vulicy Haładzieda ŭ Minsku. Fota: Minsk Naviny

Rašeńnie Minharvykankama pra pierakryćcio ruchu pa vulicu Haładzieda źjaviłasia na nacyjanalnym pravavym internet-partale. 

Učastak ruchu ad skryžavańnia z vulicaj Ubareviča da vulicy Śvisłackaj budzie zakryty z 10 maja i na davoli praciahły pieryjad: znoŭ jeździć pa hetym učastku darohi cieraź Śvisłač u Čyžoŭku možna budzie tolki z 13 śniežnia.

Haradskija ŭłady aficyjna adznačyli, što pierakryćcio źviazana z «pahrozaj biaśpiecy darožnaha ruchu, u tym liku žyćciu i (abo) zdaroŭju hramadzian».

Za pačvarnym čynavieckim kancylarytam chavajecca tryvijalny kapitalny ramont mosta cieraź Śvisłač.

Jašče ŭ kastryčniku 2024 hoda dyrektar pradpryjemstva «Hardarbud» Siarhiej Panioŭ paviedamlaŭ pra ramont mosta na vulicy Haładzieda:

«Most na vulicy Haładzieda budzie ramantavacca, chutčej za ŭsio, z poŭnym pierakryćciom ruchu. Pakolki isnujuć miascovyja šlachi abjezdu biez značnaha pavieličeńnia maršrutu. Takija miery dazvolać paskoryć terminy vykanańnia rabot», — tłumačyŭ letaś Panioŭ.

Most pa Haładzieda nie adziny abjekt infrastruktury ŭ Minsku, jaki płanujuć adramantavać u 2025 hodzie. 

Niadaŭna haradžanie ŭžo sutyknulisia z surjoznymi źmienami ruchu ŭ centry: z 8 lutaha z-za ramontu puciepravoda pa vulicy Maskoŭskaj ranicami horad staić u korkach. Raboty tut praciahnucca da 1 śniežnia.

Paralelna rychtujecca ramont jašče prykładna 10 abjektaŭ, siarod jakich post cieraź Śvisłač pa vulicy Pulichava, dva puciepravody na vulicy Daŭhabrodskaj — praz vulicu Vaniejeva i praz čyhunku Maskva — Minsk i puciepravod praz čyhunku na vulicy Brest-Litoŭskaj.

Kamientary da artykuła