U Žabincy padletka ŭkusiła šalonaja kunica

16-hadovy padletak u Žabincy paciarpieŭ ad ukusu kunicy. Incydent adbyŭsia ŭ subotu, 10 maja, piša «Anłajnier».

Skrynšoty ź videa

Chłopiec išoŭ pa darozie, kali na jaho z kustoŭ vybiehła žyviolina.

Spačatku kunica zdałasia miłym źviarkom — padletak navat pačaŭ zdymać jaje na videa. Ale amal adrazu taja nakinułasia na jaho i prakusiła palec. Historyjaj paciarpiełaha ŭ sacsietkach padzialiłasia jaho siastra Alaksandra.

Chłopiec navat nie padumaŭ, što toje, što adbyłosia, niebiaśpiečna. Prosta adšturchnuŭ kunicu i pajšoŭ hulać dalej. Ale vypadkova jon vypraviŭsia tudy, kudy zabiehła i kunica. A taja paśla ŭkusu chaatyčna pieramiaščałasia pa pryvatnym siektary i napadała na svojskich žyvioł.

Daśviedčanyja ludzi advieźli padletka ŭ balnicu, dzie jamu pastavili pieršuju vakcynu. A samu žyviolinu vyłavili i adpravili na ekśpiertyzu. Jaje vyniki pakazali, što kunica była chvoraja na šalenstva.

«Paśla zvarotu ŭ pryjomny pakoj brata adpravili na špitalizacyju ŭ chirurhičnaje adździaleńnie. Tam jon pralažaŭ noč, a ranicaj jaho adpuścili dadomu. Treba było viarnucca ŭ paniadziełak, kab zdać analizy. Vyniki nam pakul nieviadomyja. Pa słovach miedykaŭ, jamu treba budzie trochmiesiačnaja terapija», — raskazała «Anłajnieru» Alaksandra.

Dziaŭčyna dadała, što čuła: nie tak daŭno taksama ŭ Žabincy šalonaja lisa ŭkusiła sabaku, i ciapier tam uviali karancin.

Z 2012 hoda vypadki zachvorvańnia na šalenstva siarod ludziej u Biełarusi nie rehistravalisia. Pry hetym štohod kala 20 tysiač čałaviek źviartajucca da miedykaŭ paśla kantaktu z žyviołami, 30% ź ich — dzieci da 18 hadoŭ.

Tak, za vosiem miesiacaŭ minułaha hoda ŭ Biełarusi byŭ zarehistravany 171 vypadak šalenstva žyvioł: 100 u dzikaj pryrodzie i 71 siarod chatnich i sielskahaspadarčych žyvioł. Dziakujučy vakcynacyi dzikich žyvioł kolkaść šalonych asobin pastupova źnižajecca. Tak, u 2020-m kolkaść zarehistravanych vypadkaŭ šalenstva składała 752.

Kamientary da artykuła