Zatrymali administratara biełaruskaj Vikipiedyi Maksima Lepušenku

Administratar biełaruskaj Vikipiedyi Maksim Lepušenka byŭ zatrymany ŭ abied 15 maja, paviedamlaje ŭ fejsbuku adzin ź jahonych kaleh-vikipiedystaŭ.

Maksim Lepušenka. Fota: Budźma

«Jon adzin sa starejšych dziejnych redaktaraŭ raździeła, adziny biurakrat i najstarejšy administratar — atrymaŭ adpaviedny ściah jašče ŭ 2007 hodzie. U asnoŭnym pisaŭ pa staražytnaj historyi Biełarusi, ale bolš sačyŭ za paradkam u raździele i maderavaŭ roznyja sprečki», — paviedamlajuć pra Maksima Lepušenku.

Zatrymańnie Maksima Lepušenki stała nie pieršym vypadkam represij apošniaha času, skiravanych suprać aŭtaraŭ i redaktaraŭ biełaruskaj Vikipiedyi. 

Tak, redaktary biełaruskaj Vikipiedyi zaŭvažyli, što adna z administrataraŭ raździeła, Volha Sitnik, viadomaja pad nikam Chomiełka, źnikła 17 krasavika — raptoŭna pierastała pravić artykuły i vychodzić na suviaź. Tady jaje adpuścili, ale nieŭzabavie zatrymali znoŭ i asudzili na 10 sutak administracyjnaha aryštu.

U śniežni 2024 hoda byŭ zatrymany Stary Jolup, aktyŭny redaktar raździeła alternatyŭnym pravapisam. Praŭda, jaho sprava nie była źviazanaja z redahavańniem artykułaŭ.

Paśla, 13 sakavika 2025 hoda, źnik Kazimier Lachnovič (sapraŭdaje imia nieviadomaje), adzin z čatyroch administrataraŭ i biurakrat taho ž raździeła «taraškievicaj». Suviaź ź im z taho času adsutničaje, imavierna, jon byŭ zatrymany pa kryminalnaj spravie. 

Praz tydzień paśla źniknieńnia Lachnoviča vyjšaŭ prapahandyscki materyjał Ludmiły Hładkaj, u jakim prahučała, što Vikipiedyja — heta zbroja masavaha paražeńnia suprać krain postsavieckaj prastory, a biełaruski raździeł redahujecca z Polščy.

Zatrymańnie na praciahu pary miesiacaŭ adrazu niekalkich biełaruskich administrataraŭ Vikipiedyi vyhladaje častkaj adnoj akcyi, što padmacoŭvajecca napadkami prapahandystaŭ biez daj pryčyny. 

Kamientary da artykuła