U Litvu na «supierdronie» pierakinuli 3000 pačak cyharet ź Biełarusi
Heta redkaść — zvyčajna na dronie kantrabandystam udajecca pierapravić u 10 razoŭ mieniej.
Fota tut i dalej: Słužba achovy dziaržaŭnaj miažy Litvy
U Šalčyninkajskim rajonie Litvy, niedaloka ad miažy ź Biełaruśsiu, pamiežniki pasadzili bieśpiłotnik, jaki pieravoziŭ 3000 pačak kantrabandnych cyharet. Pra heta paviedamlaje Słužba achovy dziaržaŭnaj miažy Litvy.
Uviečary ŭ čaćvier litoŭskija pamiežniki zaŭvažyli kala vioski Sakalinie dron z hruzam, što lacieŭ z boku miažy ź Biełaruśsiu ŭhłyb Litvy. Jany pierachapili kiravańnie dronam i pasadzili jaho.
Pry ahladzie vyśvietliłasia, što hruz składaŭsia z šaści standartnych skrynak z cyharetami, abhornutych prazrystaj polietylenavaj plonkaj. U kardonnych skrynkach z łahatypami Hrodzienskaj tytuniovaj fabryki «Nioman» znachodziłasia pa 500 pačak cyharet «Minsk Superslims» ź biełaruskimi akcyznymi markami — usiaho 3000 pačak. Košt hetych cyharet z ulikam usich padatkaŭ, abaviazkovych dla apłaty ŭ Litvie, składaje 14 460 jeŭra.
Zvyčajna drony kantrabandystaŭ, z-za nievialikaj hruzapadymalnaści, pieranosiać 200—400 pačak cyharet, heta značyć mienš, čym źmiaščajecca ŭ zavodskaj upakoŭcy (50 błokaŭ, abo 500 pačak). Dron z 3000 pačkaŭ — redkaja vyklučnaść.
Pačata dasudovaje rasśledavańnie. Za taki ŭčynak zakonam praduhledžana abo štraf, abo pazbaŭleńnie voli terminam da čatyroch hadoŭ.
Čytajcie taksama:
Litoŭskija mytniki nie dali ŭvieźci ź Biełarusi carkoŭny zvon