Amazonskaje plemia padało ŭ sud na The New York Times za «paklopnicki» artykuł pra moładź i porna

Nievialikaje plemia maruba z Amazonii padało ŭ sud na hazietu The New York Times i niekalki inšych ŚMI, abvinavačvajučy ich u paklopie, piša Bi-bi-si.

Ludzi ź plemieni maruba. Fota: ancient-origins.net

Pavodle pazovu, artykuł NYT, u jakim havaryłasia pra dostup hetaha plemieni da vysokachutkasnaha internetu praz Starlink, pradstaviŭ supolnaść jak takuju, što nie zdolnaja spravicca navat z bazavymi technałohijami, i nibyta moładź u plemieni apynułasia pad upłyvam pornahrafii.

Pradstaŭniki plemieni maruba śćviardžajuć, što hety materyjał i nastupnyja publikacyi inšych ŚMI, u tym liku TMZ i Yahoo, prynizili ich hodnaść, vyklikali chvalu naśmiešak, parušyli kulturnuju samabytnaść i nanieśli škodu ich reputacyi. Jany patrabujuć jak minimum 180 miljonaŭ dalaraŭ kampiensacyi.

U NYT zajavili, što artykuł nie śćviardžaŭ pra najaŭnaść zaležnaści, a byŭ zbałansavanym apisańniem i pieravah, i ryzykaŭ novych technałohij dla izalavanaha naroda z bahataj historyjaj.

Praz tydzień paśla pieršaj publikacyi NYT apublikavała druhi artykuł, u jakim padkreślivała, što plemia nie stała zaležnym ad parnahrafii, a mnohija zahałoŭki inšych ŚMI chłuśliva pierakrucili sens.

Pazoŭ byŭ padadzieny ad imia lidara plemieni Enokie Maruba i brazilskaj aktyvistki Fłory Dutry, jakaja dapamahała zabiaśpiečvać internet-suviaź u rehijonie. Jany śćviardžajuć, što ich niespraviadliva abvinavacili ŭ pryniasieńni škodnaha kantentu ŭ supolnaść.

Maruba — hrupa indziejcaŭ z moŭnaj siamji pano, jakaja nasialaje paŭdniova-zachodniuju častku brazilskaha štata Amazonas (rajon Vale-du-Džavary). Kolkaść hrupy składaje kala 1800 čałaviek. Jany havorać na movie maruba.

Kamientary da artykuła