Jeŭrasajuz źniaŭ ekanamičnyja sankcyi ź Siryi

Jeŭrapiejski sajuz aficyjna admianiŭ usie ekanamičnyja sankcyi, što raniej byli nakładzienyja na Siryju, za vyklučeńniem tych, što źviazanyja z pytańniami biaśpieki, zajaviła Jeŭrapiejskaja rada.

Hetaja zajava, jak paviedamlajecca, zamacavała palityčnaje rašeńnie, abvieščanaje 20 maja 2025 hoda, skiravanaje na padtrymku siryjskaha naroda ŭ spravie ŭźjadnańnia i adnaŭleńnia krainy jak mirnaj, inkluziŭnaj i raznastajnaj dziaržavy.

U pryvatnaści, byli źniatyja abmiežavańni na finansavyja aktyvy 24 siryjskich subjektaŭ, u tym liku Centralnaha banka, ŚMI i naftavych kampanij.

Kaja Kałas, viarchoŭnaja pradstaŭnica ES pa źniešnich spravach, adznačyła, što heta pravilnaje rašeńnie ŭ taki histaryčny momant i što Jeŭrasajuz praciahnie padtrymlivać Siryju ŭ palityčnym pierachodzie da lepšaj budučyni.

Razam z hetym, Jeŭrasajuz praciahnuŭ da 1 červienia 2026 hoda piersanalnyja sankcyi suprać asob i arhanizacyj, źviazanych z byłym kiraŭnikom Siryi Bašaram Asadam. Akramia taho, uviedzienyja novyja sankcyi suprać dźviuch fizičnych i troch jurydyčnych asob za parušeńni pravoŭ čałavieka ŭ suviazi z chvalaj hvałtu ŭ Siryi ŭ sakaviku hetaha hoda.

Jeŭrasajuz dekłaruje, što budzie i dalej sačyć za situacyjaj i hatovy ŭvodzić novyja miery suprać tych, chto parušaje pravy čałavieka abo spryjaje niestabilnaści ŭ rehijonie.

Kamientary da artykuła