U niadzielu stała viadoma ab pryznačeńni brata prezidenta Siryi Achmada al-Šaraa hiensakratarom prezidenckaj administracyi. Machier al-Šaraa šmat hadoŭ žyŭ u Varoniežy i pracavaŭ u paliklinicy Rasijskaj čyhunki. Jaho žonka i maci troch jaho dziaciej — hramadzianka Rasii, a jaje siastra vałodaje firmaj, jakaja atrymlivaje dziaržpadrady ŭ Varoniežy, piša «Ahientstvo».
Jak paviedamlaje vydańnie Syria.tv, hiensakratar Administracyi prezidenta Siryi — vysokaja pasada. Kiraŭnik administracyi adkazvaje za ŭzajemadziejańnie ź dziaržustanovami, kantraluje paradak dnia prezidenta, arhanizuje jaho aficyjnyja sustrečy, sočyć za vykanańniem ukazaŭ i kaardynuje aficyjnuju pierapisku.
U 2022-2023 hadach Machier Al-Šaraa pracavaŭ kansultantam pa pytańniach achovy zdaroŭja ŭ balnicach na poŭnačy Siryi, a potym zaniaŭ pasadu ministra achovy zdaroŭja, vynikaje z publikacyi Syria.tv.
Da pierajezdu ž u Siryju Machier al-Šaraa doŭhi čas žyŭ i pracavaŭ u Rasii, paviedamili ŭ paniadziełak adrazu niekalki prakramloŭskich ŚMI.
Jany znajšli profil hiniekołaha Machiera Chusejna Alšaraa na sajcie «Pra daktaroŭ».
Pavodle dadzienych sajta, u 2000-m novy kiraŭnik prezidenckaj administracyi Siryi skončyŭ Varoniežskuju dziaržaŭnuju miedakademiju im. M. Burdenki, dzie potym nieadnarazova prachodziŭ pavyšeńnie kvalifikacyi. Z 2004 pa 2013 hady pracavaŭ u Siryi, a zatym viarnuŭsia ŭ Varoniež, dzie prapracavaŭ až da 2024 hoda. Apošnim miescam pracy Siryjca stała paliklinika RŽD, dzie jon kiravaŭ žanočaj kansultacyjaj.
Pracy na Rasijskaj čyhuncy Machieru al-Šaara nie pieraškodziŭ navat toj fakt, što ŭ pačatku 2010-ch jaho brat uznačalvaŭ «Džebchat an-Nusru», siryjski filijał «Al-Kaidy». Padtrymku «Džebchat an-Nusre» akazvała i «Isłamskaja dziaržava». Paźniej «Džebchat an-Nusra» razarvała suviazi ź IDIŁ i była pieratvorana ŭ «Chajiat Tachryr aš-Šam» (CHTŠ), jakaja ŭ pačatku 2020-ch była pryznanaja terarystyčnaj u Rasii. CHTŠ apynułasia adnoj z hałoŭnych sił, jakija razburyli režym Asada, a lidar arhanizacyi paśla hetaha staŭ novym kiraŭnikom Siryi.
Pavodle źviestak pamiežnaj słužby, ź jakimi aznajomiłasia «Ahientstvo», novy kiraŭnik Administracyi prezidenta Siryi palacieŭ z Rasii ŭ turecki horad Iźmir u lipieni 2022 hoda. Paśla hetaha, pavodle ŭciečki, jon nie viartaŭsia.
Žonka čynoŭnika — hramadzianka Rasii Taćciana Zakirava (maje taksama siryjskaje hramadzianstva), vyśvietliła vydańnie z uciečak.
U pary — troje dziaciej. Starejšamu synu Rašydu al-Šaraa ŭžo spoŭniłasia 23 hady, u 2020-m jon pastupiŭ u Varoniežski dziaržuniviersitet. Dačce Maryi — 20 hadoŭ, małodšamu synu Kamilu — 13 hadoŭ.
Zakirava až da 2020 hoda zajmałasia biźniesam, u 2000-ch jana vałodała dolaj u kampanii «Pantera» (techahlad), paśla hetaha — u firmie «Razumny sad» (łandšaftny dyzajn). Jaje partnioram pa apošnim biźniesie była rodnaja siastra Jaŭhienija Žarabcova. Žarabcova taksama vałodaje i kiruje bolš bujnoj firmaj «Niasumny sad», dachody jakoj pieravyšajuć 50 młn rubloŭ u hod. Firma siastry Zakiravaj štohod z 2013 hoda atrymlivaje dziaržkantrakty ad administracyi Varonieža na dobraŭparadkavańnie terytoryj, za apošnija try hady suma padradaŭ pieravysiła 45 młn rubloŭ.
Suviazi svajakoŭ prezidenta z Rasijaj mohuć akazać upłyŭ na adnosiny novych uładaŭ Siryi z Rasijaj, robić vysnovu «Ahientstvo». U lutym ministr abarony Siryi Murchaf Abu Kasra dapuściŭ u intervju The Washington Post, što ŭłady Siryi mohuć zachavać rasijskija bazy ŭ krainie.
Ciapier čytajuć
Stała viadoma pra śmierć 22-hadovaha chłopca, jakoha asudzili pa palityčnaj kryminałcy2
Kamientary
voś i chadzi potym da takich izuračej