Ukraina budzie bajkatavać čempijanat śvietu pa dziudo z-za ŭdziełu ŭ im biełarusaŭ

Ukrainskaja fiederacyja dziudo pryniała rašeńnie nie ŭdzielničać u čempijanacie śvietu, jaki adbudziecca ŭ červieni ŭ Budapiešcie. Pryčyna — rašeńnie Mižnarodnaj fiederacyi dziudo (IJF) dapuścić biełaruskich spartoŭcaŭ da ŭdziełu ŭ mižnarodnych spabornictvach ź dziaržaŭnaj simvolikaj — himnam, ściaham i hierbam.

Lidarka ŭkrainskaj zbornaj Julija Kurčanka. Fota: International Judo Federation

Ukrainski bok źviarnuŭsia ŭ IJF z prośbaj paćvierdzić abo abvierhnuć hetuju infarmacyju, i atrymaŭ aficyjnaje paćviardžeńnie. U adkazie adznačałasia, što fiederacyja, maŭlaŭ, imkniecca, kab sport zastavaŭsia placoŭkaj dla dyjałohu i jadnańnia, a nie dla varožaści.

Ukrainskaja fiederacyja rašuča asudziła pazicyju IJF, nazvaŭšy jaje niespraviadlivaj i takoj, što supiarečyć pryncypam adkaznaści i salidarnaści ŭ śviecie sportu. U vyniku pryniata rašeńnie admovicca ad udziełu ŭ čempijanacie samim.

Praŭda, nie ŭsie ŭkrainskija spartsmieny ličać heta rašeńnie pravilnym. Lidarka zbornaj Ukrainy Julija Kurčanka ŭ kamientary dla vydańnia «Trybuna» zajaviła, što heta «krychu sumna, tamu što [na čempijanat] zajaŭlenyja tolki dva biełarusy ŭ katehoryi da 90 kh, ź jakimi my b nijak nie sustrelisia — u nas niama ŭ kamandzie nikoha ŭ hetaj katehoryi».

«Tamu liču hetaje rašeńnie krychu niespraviadlivym u adnosinach da nas. Chaciełasia b vystupić, padniać naš ściah. Dumaju, heta ciapier vielmi važna dla našaj krainy», — dadała Kurčanka.

Čempijanat śvietu pa dziudo ŭ 2025 hodzie projdzie z 13 pa 20 červienia ŭ stalicy Vienhryi Budapiešcie.

Raniej Litva i Łatvija admovilisia prymać nacyjanalnuju zbornuju Biełarusi na čempijanacie Jeŭropy pa futzale 2026 hoda, u suviazi z čym UEFA razhladaje mahčymaść pieranosu hetaha turniru ŭ inšuju krainu.

Kamientary da artykuła