«Uskładniajuć praces rehistracyi». Dla zapisu na polskija vizy źjavilisia novyja patrabavańni

Źjavilisia novaŭviadzieńni dla tych, chto płanuje atrymlivać polskuju vizu. Pry rehistracyi na sajcie vizavaha centra ŭviali abnoŭlenuju sistemu vieryfikacyi, paviedamlaje tyktok-akaŭnt «Naši v Polšie». Heta paćviardžaje i ekśpiertka Anastasija Łysakoŭskaja. Vydańnie «Lusterka» daviedałasia, što za novaŭviadzieńni i jak jany adabjucca na karystalnikach.

Fota ilustracyjnaje

Pa słovach Anastasii Łysakoŭskaj, z 26 červienia pry rehistracyi na sajcie VFS stała nieabchodna zahružać nie tolki fatahrafiju asoby i razvarot dakumienta, ale i zdymak jaho vokładki. Akramia taho, sistema budzie fiksavać kolkaść uvachodaŭ u asabisty kabiniet.

Kali za niepraciahły čas čałaviek raspačnie zapar piać sprobaŭ aŭtaryzacyi, jahony profil zabłakujuć na niekalki hadzin. Heta, adznačaje vizavaja ekśpiertka, moža stać adnoj ź pieraškod, kab złavić «akienca».

«Navošta rabić fota vokładki, nie viedaju, bo źniać možna lubuju. Mahčyma, pry vieryfikacyi nie buduć prymać paciortuju hałoŭnuju staronku. A voś toje, što kolkaść zachodaŭ u asabisty kabiniet stali časova abmiažoŭvać, — heta dla mianie vidavočny minus.

Naprykład, čałaviek nie viedaje, ci źjavilisia daty na padaču, i zachodzić u sistemu pravieryć. Albo ž zapis anansavali, karystalnik zajšoŭ, a razdaču zatrymlivajuć. U kožnym z hetych vypadkaŭ my tracim sprobu, nie atrymlivajučy vynik, — dzielicca mierkavańniem Anastasija Łysakoŭskaja. — Da taho ž praz pamyłki ŭ pracy sajt moža prosta «vykidać» z kabinieta. Na maim vopycie, časta, kab zapisacca, treba ŭvajści ŭ jaho nie raz i nie dva».

Na dumku ekśpiertki, pryčyna novaŭviadzieńnia — baraćba z pasiarednikami.

«Adnak novyja abmiežavańni ŭskładniajuć praces rehistracyi nie tolki dla ahientaŭ, ale i dla zvyčajnych zajaŭnikaŭ, — kaža surazmoŭca. — Pry hetym kolkaści dastupnych miescaŭ na zapis bolš nie stanovicca. Asnoŭnaja nahruzka pa-raniejšamu prypadaje na Minskuju konsulskuju akruhu, dzie zapisacca vielmi składana — terminy čakańnia ŭžo dasiahajuć hoda».

Łysakoŭskaja taksama adznačaje, što ŭ piatnicu, 27 červienia, kali razdavali miescy dla rehistracyi ŭ Hrodzienskaj konsulskaj akruzie, słoty padzialili pa časie.

27 červienia ŭ Hrodzienskaj konsulskaj akruzie słoty na roznyja katehoryi viz razdavali ŭ rozny čas. Skrynšot z sajta: visa.vfsglobal.com

Spačatku išoŭ zapis na turystyčny «šenhien», potym na pracoŭnyja vizy, zatym — na astatnija, naprykład, haściavyja.

Paviedamleńni ab dadańni słotaŭ u Minskaj konsulskaj akruzie, kudy ŭvachodziać punkty ŭ Minsku, Homieli, Mahilovie. 23 červienia 2025 hoda. Skrynšot: visa.vfsglobal.com

«Abviestki ab źjaŭleńni dat dla zapisu byli i raniej. Ale kali tady paviedamlali, što pačynajecca rehistracyja na ŭsie katehoryi viz, to ciapier jany vykidvajuć ich pastupova, — adznačaje surazmoŭca. — Jak heta budzie pracavać dalej i ci raspaŭsiudzicca na inšyja rehijony, niezrazumieła. Niadaŭna razdavali miescy na Minskuju konsulskuju akruhu. Tam prosta było paviedamleńnie pra «ŭkid» u adzin čas. 

Kamientary da artykuła